ერთიანი ნაციონალური მოძრაობა იუსტიციის მინისტრს, თეა წულუკიანს წინასაარჩევნოდ ამომრჩეველთა სიის გაყალბების მცდელობაში ადანაშაულებს. საქმე ეხება მინისტრის ბრძანებას, რომლის თანახმადაც, გარკვეული კატეგორიის პირებისთვის მარტივდება პირადობის მოწმობის აღება.

ენმ-ს წევრის, ირაკლი აბესაძის განმარტებით, ზეამოაღნიშნულის შედეგად შესაძლოა მივიღოთ ასეულობით და ათასობით ახალი ამომრჩეველი, არჩევნებამდე 11 დღით ადრე:

"საარჩევნო სუბიექტებს ექნება ძალიან ცოტა დრო გადასამოწმებლად, რამდენად ობიექტურად განხორციელდა პროცესი, რომელშიც თავად დაინტერესებული პირი, ამომრჩეველი მონაწილეობას არ იღებდა და გამგეობამ გადაწყვიტა საკითხი მისი სიაში მოხვედრის შესახებ".

თინათინ ბოკუჩავას თქმით კი, ბიძინა ივანიშვილის მთავრობა მიხვდა, რომ არსებული ამომრჩევლებით ის 8 ოქტომბრის არჩევნებში დამარცხდება:

"ის [ივანიშვილი] წულუკიანის ხელით ცდილობს, რომ შექმნას სრულიად ახალი ამომრჩეველი, რომ წაგებული არჩევნების შედეგების მანიპულაცია უკვე ამ გზით რამენაირად მოახერხოს".