2012 წლიდან დღემდე განახევრებულია იმ ადამიანთა რაოდენობა, ვინც მიიჩნევს, რომ მის შეხედულებებთან ყველაზე ახლოს დგას ქართული ოცნება. ამის შესახებ საუბარია საზოგადოებრივი აზრის კვლევაში, რომელიც ეროვნულ-დემოკრატიულმა ინსტიტუტმა (NDI) დღეს გამოაქვეყნა.

2012 წელს მოსახლეობის 60 პროცენტზე მეტი აცხადებდა, რომ მის შეხედულებებთან ყველაზე ახლოს იდგა ქართული ოცნება, 2017 წლის დეკემბრის მონაცემებით, იგივეს მხოლოდ გამოკითხულთა 30 პროცენტი ამბობს.

47 პროცენტია იმ ადამიანთა ჯამი, რომელიც კითხვას პასუხს არ სცემს, ან არ იცის, ან კიდევ, არცერთ პარტიას არ მიიჩნევს თავის შეხედულებებთან ახლოს მდგომად.

მოქალაქეების მხოლოდ 10 პროცენტისთვისაა ყველაზე ახლობელი ერთიანი ნაციონალური მოძრაობა, სხვა პარტიების ჯამური მაჩვენებელი კი, ამ შემთხვევაში, 12 პროცენტია.

UK aid-ის ფინანსური ხელშეწყობით კვლევა NDI-ის დაკვეთით CRRC საქართველომ ჩაატარა. წარმომადგენლობითი შერჩევით (ოკუპირებული ტერიტორიების გარდა) კვლევა 29 ნოემბრიდან 19 დეკემბრამდე პერიოდში ჩატარდა, პირისპირ ინტერვიუთი გამოიკითხა 2 298 ადამიანი (გამოპასუხება 48%). კვლევაში მონაწილე პირები შემთხვევითი შერჩევის მეთოდით შეირჩნენ, ცდომილება კი - 1,9 პროცენტია.