დღეს, აზერბაიჯანელი ჟურნალისტის, აფგან მუხტარლის და, ნურანა და ორი მცირეწლოვანი ბავშვი ზაქათალას რაიონში, ბინაში მკვდრები იპოვეს. ინფორმაციას MeydanTV ავრცელებს. საინფორმაციო სააგენტო Turan-ის თქმით, ისინი გაზის გაჟონვის შედეგად გარდაიცვალნენ.

MeydanTV-ის განმარტებით, გარდაცვლილი მცირეწლოვნებიდან ერთი ნურანის შვილი, ხოლო მეორე ძმიშვილი იყო. ბინაში ნურანის კიდევ ერთი შვილი იყო, რომელიც გადარჩა.

ადგილობრივი მედიის ცნობით, აფგან მუხტარლის მომხდარის შესახებ უკვე შეატყობინეს და მისმა ადვოკატმა პენიტენციურ სისტემას მიმართა, რათა ჟურნალისტმა გასვენებისთვის დაწესებულების დატოვება შეძლოს. MeydanTV-ის თქმით, პასუხი ჯერ ცნობილი არ არის.

აფგან მუხტარლი თბილისიდან 29 მაისს გაუჩინარდა და მეორე დღეს ბაქოს ციხეში აღმოჩნდა. ნოემბერში აზერბაიჯანის სასამართლომ შინაპატიმრობაზე უარი უთხრა.