საზოგადოებრივი მაუწყებლის სამეურვეო საბჭოს თავმჯდომარე, გრიგოლ გოგელია ამბობს, რომ საბჭოსთვის მიუღებელი იყო ზვიად რატიანის დაკავების ამსახველ კადრებზე მომზადებული სიუჟეტი. ასე გამოეხმაურა გოგელია პოეტ ზვიად რატიანის დაკავების შესახებ შსს-ს მიერ საზოგადოებრივი მაუწყებლისთვის მიწოდებული ფრაგმენტების განთავსებას.

"ვთვლით, რომ აქ ის სტანდარტები, რომლის მიხედვითაც საზოგადოებრივი მაუწყებელი უნდა მუშაობდეს, დაირღვა. მაგრამ აქვე დავძენ, რომ საზოგადოებრივი მაუწყებელი არ არის მხოლოდ ბორდის ან მენეჯემენტის მაუწყებელი. ჩვენ საზოგადოებას მივეცით ის მექანიზმი [თვითრეგულირების მექანიზმი], როცა შესაძლებელია... [სიუჟეტზე] მაუწყებელში სპეციალურმა ინსტიტუტებმა იმსჯელოს. გააკეთოს რეაგირება და მიიღოს გადაწყვეტილება", - აღნიშნა გრიგოლ გოგელიამ.

იმის მიუხედავად, რომ არხის გენერალური დირექტორი, ვასილ მაღლაფერიძე ამ მასალასთან დაკავშირებით პასუხისმგებლობის გაზიარებაზე საუბრობს ვიდეო პირვანდელი სახით კვლავ იძებნება საზოგადოებრივი მაუწყებლის ვებგვერდზე.

საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეო კადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.