რუსეთში ოპოზიციის ლიდერმა ალექსეი ნავალნიმ საკუთარ მხარდამჭერებს მოუწოდა, რომ 2018 წლის საპრეზიდენტო არჩევნებს ბოიკოტი გამოუცხადონ. ამომრჩევლების გაფიცვის შესახებ ნავალნიმ განცხადება მას შემდეგ გააკეთა, რაც 25 დეკემბერს რუსეთის ცენტრალურმა საარჩევნო კომისიამ მისი კანდიდატურა არ დაარეგისტრირა.

"პროცედურა, რომელშიც ჩვენ მონაწალიეობისკენ მოგვიწოდებენ, არ არის არჩევნები. მასში მონაწილეობს მხოლოდ პუტინი და ის კანდიდატები, ვინც მან პირადად აირჩია, ვინც მისთვის არანაირ საფრთხეს არ წარმოადგენს", - ამბობს ნავალნი ვიდეომიმართვაში.

ნავალნის გეგმის მიხედვით, ამომრჩეველთა ყველა შტაბი გაფიცვის შტაბად იქცევა. შტაბის აქტივისტები არჩევნებზე მოსახლეობის აქტივობას დააკვირდებიან და, ასევე, მომავალი არჩევნების საწინააღმდეგო აგიტაციას ჩაატარებენ. საბოლოოდ კი მან მოუწოდა ყველას, რომ არ აღიარონ შედეგები და ხელისუფლება, რომელიც 2018 წელს აირჩევა.