დღეს, 24 დეკემბერს ანაკლიის ღრმაწყლოვანი პორტის მშენებლობა დაიწყო.

"ყოველგვარი გადაჭარბების გარეშე, ჩვენ ვიწყებთ 21-ე საუკუნის საქართველოს ყველაზე დიდ პროექტს - ანაკლიის ღრმაწყლოვანი პორტის მშენებლობას", - განაცხადა საქართველოს პრემიერ-მინისტრმა, გიორგი კვირიკაშვილმა.

მისივე თქმით, პორტი უნიკალური პროექტია, რადგან იგი აბრეშუმის გზის რუკაზე განამტკიცებს საქართველოს პოზიციას. კვირიკაშვილის თქმით, პორტი საქართველოს შესაძლებლობას მისცემს მიიღოს ყველაზე დიდი გემები, რეგიონისა და საქართველოს მაცხოვრებლებისთვის კი სრულიად ახალი საქმეების, ბიზნესების დაწყების შესაძლებლობა გაჩნდება.

"დღეს ძნელიც კია, გამოვთვალოთ ის ეფექტი ჩვენს ეკონომიკაზე, რომელსაც ეს პორტი მოიტანს. ეს არის რეალობა, აქ არაფერია გადაჭარბებული. ამ პორტის გარშემო, რამდენიმე ათასი ჰექტარი განვითარდება, როგორც საწარმოო, სასაწყობე, ლოგისტიკური და რა თქმა უნდა, საცხოვრებელი ახალი ზონა."