ფინანსთა სამინისტროს საგამოძიებო სამსახურმა ქონების ეროვნული სააგენტოს მიმართვის საფუძველზე, გამოძიება დაიწყო ქონების ეროვნული სააგენტოს მიერ შპს "კონსტრაქტ ვიჟენისთვის" გადაცემული ქონების მითვისება-გაფლანგვის ფაქტზე.

გამოძიება მიმდინარეობს საქართველოს სისხლის სამართლის კოდექსის 182-ე მუხლის მე-3 ნაწილის ბ პუნქტით.

მანამდე, რუსთავი 2-ის ჟურნალისტის მიერ მოპოვებული ინფორმაციით ირკვევა, რომ გასულ წელს, ეკონომიკის სამინისტრომ გიორგი გაჩეჩილაძის (უცნობის) სიძის, გიორგი შარაშიძის, კომპანიას "კონსტრაქტ ვიჟენს" 326 ათას ლარად 13 000 მ2 მიწა და ოთხი შენობა გადასცა, რათა იქ მინა-პლასტიკის საწარმო აეშენებინა და 700 ათასი ლარის ინვესტიცია განეხორციელებინა.

რუსთავი 2-ის ინფორმაციით, გაჩეჩილაძეების ოჯახმა პირობა არ შეასრულა და 2017 წლის ზაფხულში მათ ქონება ჩამოართვეს. კურიერის ჟურნალისტის მიერ მოპოვებული დოკუმენტით, ქონების მართვის სააგენტოსათვის გადაცემულ ტერიტორიაზე ისევ დგას ოთხი შენობა, მაგრამ რეალურად შენობები ზაფხულის შემდეგ დანგრეულია.

კურიერთან საუბრისას, თბილისის საკრებულოს დეპუტატი, ლევან ხაბეიშვილი, ამტკიცებს, რომ ოთხი შენობის დემონტაჟის შემდეგ მისი ნაწილები გაჩეჩილაძეებმა გაყიდეს და სახელმწიფოს ნახევარი მილიონი ლარი მოპარეს.