საქართველოს მთავრობა ამერიკის შეერთებული შტატების მთავრობისგან 37 583 714 აშშ დოლარის ანტისატანკო სისტემების შეძენას გეგმავს. საქართველოს თავდაცვის სამინისტრომ მომსახურების შესაძენად მოთხოვნა შესყიდვების სააგენტოს უკვე გაუგზავნა. სააგენტო მოთხოვნის დაზუსტებას ელოდება.

შესყიდვის ობიექტებია:

  • ჯაველინის რაკეტა კონტეინერით FMG-148C - 120 EA;
  • ჯაველინი ბლოკი 1 (M98A2) მართვადი გამშვები მოწყობილობა - 70 EA;
  • ასევე თანამდევი აღჭურვილობა და მომსახურება;

როგორც თავდაცვის სამინისტრო აღნიშნავს, შეთავაზებას ვადა 2018 წლის 3 იანვარს გასდის და ტენდერის გამოცხადების შემთხვევაში, ალტერნატიული მიმწოდებლის არ არსებობის შემთხვევაში შესყიდვა შეუძლებელი იქნება.

უწყებაში აღნიშნავენ, რომ FGM 148 Javelin აშშ-ს წარმოების ბოლო თაობის, მაღალტექნოლოგიური, ტანკსაწინააღმდეგო სისტემაა, რომლის მსგავსს მხოლოდ რამოდენიმე ქვეყანა აწარმოებს.

"შეიარაღებული ძალების გენერალურმა შტაბმა განახორციელა სხვადასხვა ტანკსაწინააღმდეგო საშუალებების ტექნიკური შედარება და დაადგინა რომ აღნიშნული ტანკსაწინააღმდეგო საშუალების არსებობა შეიარაღებულ ძალებში, ერთი მხრივ, მნიშვნელოვნად გაზრდის მის საბრძოლო შესაძლებლობებს და მეორე მხრივ, მომსახურე პერსონალის უსაფრთხოებას, რადგან სხვა მრავალი ტანკსაწინააღმდეგო საშუალებისგან განსხვავებით FGM 148 Javelin გამოყენებით შესაძლებელია მიზნის ეფექტური აღოჩენა/გასროლის განხორციელება და მომსახურე პერსონალის მიერ პოზიციის მყისიერად დატოვება", - ასე განმარტავენ თავდაცვის სამინისტროში ჯაველინის ანტისატანკო მოწყობილობის შეძენას.

საქართველოს მთავრობის მიერ ანტისატანკო სისტემების შეძენის შესახებ ინფორმაცია ნოემბერში გახდა ცნობილი. მაშინ საუბარი იყო 75 მილიონი აშშ დოლარის ტექნიკაზე.

განახლება: 20 დეკემბერს თავდაცვის მინისტრმა, ლევან იზორიამ აღნიშნა, რომ საქართველო ჯაველინის ანტისატანკო სისტემებს ორ ეტაპად შეიძენს და ჯამში 160 მილიონ ლარს დახარჯავს.