სტამბოლში, ათათურქის აეროპორტის მიმდებარე ტერიტორიაზე ორი აფეთქების შემდეგ აეროპორტი შეფერხებით მუშაობს, ფრენა ფაქტობრივად, შეწყვეტილია. თურქეთის ავიახაზების თბილისი–სტამბოლის რეისი, რომელიც ადგილობრივი დროით დანიშნულების ადგილზე 00:30 საათზე უნდა ყოფილიყო, ანკარის აეროპორტისკენ გადაამისამართეს. თურქეთის სხვა აეროპორტებისკენ გაუშვეს ბარსელონადან და მსოფლიოს სხვა ქალაქებიდან მომავალი რეისებიც.

FlightRadar24–ის ინფორმაციით, ათათურქის აეროპორტში გადადებულია ავიარეისების აბსოლუტური უმრავლესობა, რამდენიმე რეისი კი საერთოდ გაუქმდა, მათ შორის ამსტერდამიდან და ფრანკფურტიდან.

აეროპორტში აფეთქება ადგილობრივი დროით 28 ივნისს, დაახლოებით 22:00 საათზე მოხდა. CNN Turk-ის ინფორმაციით, დაღუპულია სულ მცირე 10 ადამიანი, დაშავებულთა რიცხვი კი 60–ს აჭარბებს. თუმცა, სხვა ადგილობრივი მედიასაშუალებების ინფორმაციით, დაღუპულთა რიცხვი 28–ს აღწევს.

გადადებული რეისები ათათურქის აეროპორტში.

ფოტო: Flightradar24

არსებული ინფორმაციით, აფეთქება და სროლის ხმა აეროპორტის ავტოსადგომთან მოხდა.