საქართველოს ეროვნული ბანკმა დღეს, 13 დეკემბერს, რეფინანსირების განაკვეთი 25 ერთეულით, 7,25 პროცენტამდე გაზარდა. ეს იმას ნიშნავს, რომ რამდენიმე ათას ადამიანს, რომელსაც ბანკებში სესხი რეფინანსირების განაკვეთზე აქვთ მიბმული პროცენტი გაეზრდება.

რეფინანსირების განაკვეთი ეროვნულმა ბანკმა ინფლაციის გამო გაზარადა. უწყებაში აღნიშნავენ, რომ არსებული პროგნოზით, ინფლაციის მაჩვენებელი 2018 წლის დასაწყისიდან, დროებითი ფაქტორების ამოწურვასთან ერთად, შემცირებას დაიწყებს. ნოემბერში წლიური ინფლაცია 6,9 პროცენტი იყო.

"მონეტარული პოლიტიკის შემდგომი გამკაცრების ზომა და ხანგრძლივობა დამოკიდებული იქნება იმაზე, თუ რამდენად სწრაფად შემცირდება ნომინალური ეფექტური გაცვლითი კურსიდან ფასებზე მომდინარე ზეწოლა", - აღნიშნავენ ეროვნულ ბანკში.

საზოგადოება და ბანკების მონაცემებით, 2017 წლის პირველი ნოემბრის მდგომარეობით ცვლად საპროცენტო განაკვეთზე მიბმული 35 530 სესხია გაცემული, რაც ჯამში 1648,5 მლნ ლარია.