როდესაც ფოტოგრაფი პოლ ნიკლენი და ბუნების დამცველთა ჯგუფის, Sea Legacy-ს რეჟისორები ბაფინის კუნძულებზე ჩავიდნენ ზაფხულის მიწურულს, მათ საკმაოდ შემზარავი კადრი დახვდათ იქ: შიმშილისგან ღონემიხდილი პოლარული დათვი, რომელიც სიკვდილისთვის იყო განწირული.

დათვები ნიკლენისთვის უცხო არაა. კანადის შორეულ ჩრდილოეთში გაზრდილმა ბავშვმა, რომელიც ბიოლოგი იყო და შემდეგ ველური ბუნების ფოტოგრაფი გახდა, 3000-ზე მეტი დათვი ნახა. მაგრამ ჩონჩხის მსგავსი პოლარული დათვი, რომლის ვიდეოც ნიკლენმა სოციალურ ქსელში 5 დეკემბერს გამოაქვეყნა, ერთ-ერთი ყველაზე გული მომკვლელი სანახაობა იყო, რაც კი მას ოდესმე უნახავს.

„იქ ვიდექით და ვტიროდით - ცრემლები ლოყებზე ჩამოგვდიოდა და ისე ვიღებდით“ - ამბობს ის.

ვიდეოზე ჩანს, თუ როგორ ებღაუჭება პოლარული დათვი სიცოცხლეს, როგორ ფარავს თეთრი თმა მის გაძვალტყავებულ სხეულს. დათვი სიარულისას ერთ-ერთ ფეხს ითრევს, დიდი ალბათობით იმიტომ, რომ მას კუნთის ატროფია დაემართა. საჭმლის ძიების მიზნით, პოლარული დათვი ნელა ქექავს იქვე მდგომ ნაგვის ყუთს, რომელსაც ინუიტი მეთევზეები იყენებენ. სამწუხაროდ, ნაგავში ვერაფერი იპოვა და მორჩილად დაეცა მიწაზე.

იმ დღეს, როდესაც ნიკლენმა გამოაქვეყნა ეს კადრები, მას ეკითხებოდნენ, თუ რატომ არ დაეხმარა საწყალ დათვს. მან ასე უპასუხა ასეთ კომენტარებს:

„რა თქმა უნდა, ამან გამივლო თავში აზრად. თუმცა, იმ დროს ნამდვილად არ მქონდა ტრანკვილიზატორიანი იარაღი და 400 ფუტი სელაპის ხორცი“.

მისივე თქმით, რომ ჰქონოდა საჭმელი, ის მხოლოდ გაახანგრძლივებდა პოლარული დათვის ტანჯვას. გარდა ამისა, ველური პოლარული დათვების გამოკვება კანადაში არალეგალურია.

„როდესაც მეცნიერები ამბობენ, რომ დათვები გადაშენების პირას არიან, მინდა, რომ ხალხმა გაიაზროს, სინამდვილეში როგორ გამოიყურება ეს პროცესი. დათვები შიმშილით დაიხოცებიან. ასე გამოიყურება სიკვდილამდე მშიერი დათვი“. - ამბობს ნიკლენი.