საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, დიდი ოდენობით ქრთამის აღების ბრალდებით ფოთის მუნიციპალიტეტის მერიის თანამშრომელი დააკავეს.

დაკავებული ფოთის მერიის კულტურის, ძეგლთა დაცვის, სკოლამდელი და სკოლის გარეშე აღზრდის დაწესებულებათა კოორდინაციის სამსახურის კულტურისა და ძეგლთა დაცვის განყოფილების მთავარი სპეციალისტია.

გამოძიების ვერსიით, ბრალდებულმა უცხო ქვეყნის მოქალაქეს, ეკონომიკის სამინისტროს ბალანსზე რიცხული მიწის ნაკვეთის პირდაპირი წესით შესყიდვაში და შემდგომ მშენებლობის ნებართვის დაჩქარებული წესით გაცემაში ქრთამის სანაცვლოდ დახმარებას შეჰპირდა.

ანტიკორუფციული სააგენტოს ინფორმაციით, სანაცვლოდ მან ქრთამის სახით მოსთხოვა მიწის ნაკვეთის ღირებულების 10% - 24 000 ლარი, საიდანაც წინასწარ მოითხოვა თანხის ნაწილი - 8000 ლარი.

სუს-ი აცხადებს, რომ ბრალდებული ქრთამის აღების დროს დააკავეს. გამოძიება დიდი ოდენობით ქრთამის აღების ფაქტზე მიმდინარეობს, რაც სასჯელის სახედ ითვალისწინებს თავისუფლების აღკვეთას 7 დან 11 წლამდე ვადით.