პრეზიდენტ გიორგი მარგველაშვილის განცხადებით, ანა დოლიძე პრეზიდენტის ადმინისტრაციაში საპარლამენტო მდივნის თანამდებობას დაიკავებს.

მისივე თქმით, დოლიძის პირველივე საქმიანობა მოსამართლეების დამტკიცებას შეეხება. გიორგი მარგველაშვილის განმარტებით, იგი შეეცდება გადაწყვეტილების მიღებაში დაარწმუნოს დეპუტატები:

"საზოგადოებისთვის ცნობილია, რომ რამდენიმე თვის წინ მე წარვადგინე 3 მოსამართლის კანდიდატურა პარლამენტში დასამტკიცებლად და მოხდა ისე, რომ პარლამენტმა არ დაამტკიცა ისინი. ეს არის განსაკუთრებით პრობლემური, გამომდინარე იქედან რომ ერთის მხრივ ჩემ მიერ წარდგენილი კანდიდატურები არიან უმაღლესი კვალიფიკაციის იურისტები და პარლამენტში არცერთი პოზიცია მათ წინააღმდეგ არ დაფიქსირებულა. აქედან გამომდინარე, ბუნებრივი იყო რომ ეს კანდიდატურები უნდა დამტკიცებულიყვნენ".

აქამდე ანა დოლიძე თავდაცვის მინისტრის მოადგილის პოსტს იკავებდა. მან დღეს დატოვა თანამდებობა.

მარგველაშვილის თქმით, უზენაესი სასამართლო ფაქტიურად ვეღარ ფუნქციონირებს, რადგან სისხლის სამართლის კოლეგია არ ჰყავს. მან კიდევ ერთხელ მოუწოდა პარლამენტს, მხედველობაში მიიღოს არსებული ვითარება და მის მიერ წარდგენილ კანდიდატებზე სერიოზულად იმსჯელოს.

პრეზიდენტის განცხადებით, ის ხელახლა წარადგენს თამარ ლალიაშვილისა და ნონა თოდუას კანდიდატურებს:

"ჩემი მზაობა, რომ მხარი დავუჭირო ამ კანდიდატურებს კიდევ უფრო მკაფიოა არსებული პროცესიდან გამომდინარე".

10 ივნისს, პრეზიდენტის მიერ შეთავაზებულ უზენაესი სასამართლოს მოსამართლეობის კანდიდატებს პარლამენტმა მხარი არ დაუჭირა.
უზენაეს სასამართლოში მათ დამტკიცებას სულ მცირე 76 დეპუტატის მხარდაჭერა სჭირდებოდა. კენჭისყრა ასეთი შედეგით დასრულდა: ანა დოლიძე 34 - მომხრე, 4 - წინააღმდეგი; თამარ ლალიაშვილი 27-მომხრე, 2 - წინააღმდეგი; ნონა თოდუა 22- მომხრე, არც ერთი წინააღმდეგი.