პარლამენტში ადამიანის უფლებათა კომიტეტმა სახალხო დამცველად ნინო ლომჯარიას კანდიდატურას მხარი დაუჭირა. ლომჯარიამ კომიტეტის წევრებს თავისი ხედვები გააცნო.

კენჭისყრაში მონაწილეობა არ მიუღიათ ოპოზიციის წარმომადგენლებს. ნაციონალური მოძრაობის ერთ-ერთი წევრის, სალომე სამადაშვილის თქმით, მათ ბევრი პრეტენზია აქვთ უშუალოდ პროცესთან დაკავშირებით.

"არანაირ ფორმატში არ მომხდარა კონსულტაციები შესაძლო კანდიდატთან დაკავშირებით უმრავლესობასა და ოპოზიციას შორის, რაც არის მნიშვნელოვანი ხარვეზი. მომავალში რეგლამენტით უნდა გაიწეროს ბევრად უფრო ადრეულ ეტაპზე ოპოზიციის თანამონაწილეობა ამ პროცესში".

ევროპული საქართველოს წევრის, ოთო კახიძის განმარტებით, საპარლამენტო უმცირესობა სახალხო დამცველის არჩევისა და დამტკიცების პროცესში მონაწილეობას არ მიიღებს:

"საპარლამენტო უმცირესობასთან კონსულტაციები არ ყოფილა. ჩვენ ვერ მოვუსმინეთ ოთხივე კანდიდატს, რომ შეგვედარებინა მათი ხედვა, სხვადასხვა შეხედულება ამა თუ იმ საკითხზე".

ადამიანის უფლებათა დაცვის კომიტეტის თავმჯდომარის, სოფო კილაძის განცხადებით, ოპოზიციის ბრალდებები უსაფუძვლოა და სახალხო დამცველის არჩევის პროცესი გამჭვირვალეა.

გუშინ, 27 ნოემბერს, საპარლამენტო უმრავლესობამ სახალხო დამცველის კანდიდატად ნინო ლომჯარია პარლამენტში ოფიციალურად წარადგინა.

საქართველოს მოქმედ სახალხო დამცველს, უჩა ნანუაშვილს უფლებამოსილება 7 დეკემბერს ეწურება. ნინო ლომჯარია ერთ-ერთი იყო იმ ოთხი ადამიანიდან, რომელთა კანდიდატურაც არასამთავრობო ორგანიზაციებმა უმრავლესობას შესთავაზეს.