ახალი პოლიტიკური ცენტრი გირჩის წარმომადგენელი, გუგა ჩაფიჩაძე განმარტავს, რომ თავდაცვის მინისტრის მიერ დღეს მიღებული გადაწყვეტილება იმასთან დაკავშირებით, რომ სავალდებულო სამხედრო გაწვევა გაუქმდა, პოპულისტური ნაბიჯია, რადგან მას რეალურ ცვლილებებთან კავშირი არ აქვს.

კერძოდ, ჩაფიჩაძე განმარტავს, რომ აღნიშნული გადაწყვეტილება მხოლოდ იმ მოქალაქეებს შეეხებათ, რომელთაც აქამდე თავდაცვის სამინისტრო იწვევდა ჯარში, ხოლო დანარჩენ 75% მოქალაქეს, რომლებსაც შინაგან საქმეთა სამინისტრო და სასჯელაღსრულების დეპარტამენტი იწვევს, არ ეხებათ:

"თინათინ ხიდაშელი ოქტომბრის მერე აღარ იქნება მინისტრი, რაც ნიშნავს, რომ შემდეგ მინისტრს ექნება უფლება, ისევ აღადგინოს ამ 25%-ის გაწვევა ყაზარმებში (თავდაცვის სამინისტრო). მოხშირდა საუბარი, რომ არჩევნების შემდეგ, ქართული ოცნების გამარჯვების შემთხვევაში, თავდაცვის მინისტრი გახდება ბატონი სესიაშვილი, რომელიც სავალდებულო სამხედრო სამსახურის გაუქმების კატეგორიული წინააღმდეგია".

ჩაფიჩაძე ასევე ამბობს, რომ ხიდაშელის დღეს მიღებული გადაწყევტილება ვერ შეეხება შსს-სა და სასჯელაღსრულების დეპარტამენტს. გარდა ამისა, მისი თქმით, თავდაცვისა და უსაფრთხოების კომიტეტი ცვლილების წინააღმდეგია, რაც ართულებს ამ საკითხის საკანონმდებლო რეგულირებას, რომლის გარეშეც ეს თემა მუდმივად იქნება განსხვავებული იდეების მქონე მინისტრების გადასაწყვეტი, განაახლებენ თუ შეწყვეტენ იძულებით გაწვევას:

"საჭიროა პარლამენტარებმა მხარი დაუჭირონ გირჩის ინიციატივას, სავალდებულო სამხედრო სამსახურის გაუქმების შესახებ, წინააღმდეგ შემთხვევაში, მოგვიწევს მუდმივი მარჩიელობა, თუ რას გადაწყვეტენ ახალი მინისტრები".

ჩაფიჩაძის მიერ გავრცელებული ინფორმაცია On.ge-ს თავდაცვის სამინისტროში დაუდასტურეს და განუმარტეს, რომ ხიდაშელის მიერ დღეს მიღებული ცვლილება სამხედრო მოსამსახურეთა მხოლოდ იმ 25%-ს შეეხება, რომელსაც აქამდე თავდაცვის სამინისტრო იწვევდა ჯარში.

დღეს თავდაცვის მინისტრმა, თინა ხიდაშელმა მედიასთან გამართულ შეხვედრაზე ბრძანებას მოაწერა ხელი, რომელიც, მისი თქმით, სამხედრო მოსამსახურეების ჯარში სავალდებულო გაწვევის გაუქმებას გულისხმობს.

თინა ხიდაშელი: სამხედრო სავალდებულო გაწვევა გაუქმებულია