აჭარის ჯანდაცვის მინისტრის, ზაალ მიქელაძის განცხადებით, კლინიკაში გადაყვანილი იყო ხანძრის შედეგად დაზარალებული 21 პირი. მათ სიცოცხლისთვის საშიში ნიშნები არ აღენიშნებათ. იდენტიფიცირებულია დაზარალებულთა ვინაობაც:

"მათგან 3 უკვე გაეწერა ბინაზე. კლინიკაში რჩება 18 მოქალაქე, მათგან 1 ისრაელის მოქალაქეა, 5 თურქეთის, დანარჩენები ჩვენი ქვეყნის მოქალაქეები არიან. ყველა მათგანს აღენიშნება ინტოქსიკაციის ნიშნები, ეს არის ნახშიროჟანგით ინქოქსიკაცია, მათი მდგომარეობა ამ წუთისათვის არის სტაბილური, სიცოცხლისთვის საშიში ნიშნები არ აღენიშნებათ".

ბათუმში, სასტუმრო ლეოგრანდში ხანძრის შედეგად, წინასწარი ინფორმაციით, 11 ადამიანი დაიღუპა. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის არიან როგორც სტუმრები, ასევე სასტუმროს თანამშრომლები. ისინი სხვადასხვა სირთულის ინტოქსიკაციის გამო, გადაყვანილი არიან ბათუმის კლინიკებში. გამოძიება სახანძრო უსაფრთხოების წესის დარღვევის მუხლით მიმდინარეობს.