ბრიტანელი სარა ჰოლი, რომელიც 6 წლის ბიჭის დედაა, ამბობს, რომ ზღაპარი, მძინარე მზეთუნახავი, მიუღებელი ქცევების გავრცელებას ხელს უწყობს და ის ბავშვებს არ უნდა წაუკითხონ.

მისი აზრით, პრინცის საქციელი ბავშვებს ასწავლის, რომ მძინარე გოგოსთვის მისი თანხმობის გარეშე კოცნა მისაღებია.

სარა ჰოლი სკოლისგან ითხოვს, რომ წიგნი დაბალკლასელების საკითხავი პროგრამიდან ამოიღონ.

40 წლის სარას თქმით, ის თავის 6 წლის ბიჭს სასკოლო წიგნს უკითხავდა, როცა პრობლემა აღმოაჩინა და სკოლას ამის შემდეგ დაუკავშირდა:

"დღევანდელ საზოგადოებაში, ეს მიუღებელია. ჩემი ბიჭი მხოლოდ 6 წლისაა და ის ყველაფერს სწავლობს და ისრუტავს, რასაც გარშემო ხედავს".

სარა ჰოლი დასძენს, რომ, სკოლისგან მძინარე მზეთუნახავის წიგნის სრულად აკრძალვას არ ითხოვს და მიიჩნევს, რომ მოზარდები ამ თემაზე საუბრით სასარგებლო დასკვნების გამოტანას შეძლებენ.