ისნის რაიონში 21-22 ნოემბრის სპეცოპერაციისას დაკავებული, სავარაუდოდ უცხო ქვეყნის მოქალაქის საქმის პროკურორმა ჟურნალისტებს უთხრა, რომ ბრალდებულის ვინაობას, მოქალაქეობასა და სხვა დეტალებს, საქმის ინტერესებიდან გამომდინარე ვერ გაასაჯაროვებს.

თბილისის საქალაქო სასამართლოში, სპეცოპერაციის დროს დაკავებული პირისთვის აღკვეთის ღონისძიებაზე მსჯელობა დახურულ სხდომაზე დაიწყო. მოსამართლე რომან ხორავამ სხდომა დაწყებამდე დაიხურა. სხდომათა დარბაზი, სადაც აღკვეთის ღონისძიებაზე უნდა ემსჯელათ, პროცესის დაწყებამდე რამდენიმე წუთით ადრე შეიცვალა, რათა ჟურნალისტებს შემთხვევით არ გადაეღოთ კადრები.

საქმის კიდევ ერთმა პროკურორმა, ირაკლი მარშანიამ ჟურნალისტებს უთხრა, რომ პროკურატურას აქვს ყველანაირი დასაბუთება, რათა ბრალდებულს წინასწარი პატიმრობა შეეფარდოს. მისივე თქმით, მან ტერორისტული მიზნებისთვის შეიძინა საბრძოლო მასალები. მარშანიას ჟურნალისტებმა ასევე ჰკითხეს, სპეცოპერაციისას ლიკვიდირებულთა შორის არის თუ არა აჰმედ ჩატაევი, რაზეც პროკურორმა თქვა, რომ გვამები ჯერ იდენტიფიცირებული არ არის.

პირს, რომლისთვისაც აღკვეთის ღონისძიების სახით პატიმრობის შეფარდების საკითხი განიხილება, ტერორიზმის მუხლით აქვს ბრალი წაყენებული. მისი სახაზინო ადვოკატი, იმედა ქარქაშაძე ამბობს, რომ მისი დაცვის ქვეშ მყოფი დუმილის უფლებას იყენებს და ბრალს არ აღიარებს. მისი თქმით, ბრალდებული რუსეთის მოქალაქეა.

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია.