17 ნოემბერს, 7:30-ზე, ბამბის რიგის ქ. #7-ში ფინანსური ტექნოლოგიების ამერიკელი პიონერი და ციფრული ვალუტის პლატფორმა Spotcoin-ის დამფუძნებელი — ენდრიუ თორნჰილი სტარტაპერების საერთაშორისო პროგრამა Startup Grind-ის ფარგლებში კრიპტოვალუტის საგანმანათლებლო მასტერკლასს გაუძღვა. მან სტარტაპერებს და ინვესტორებს ფინანსური ტექნოლოგიების სფეროში სხვადასხვა კონტინენტზე დაგროვილი გამოცდილება გაუზიარა. ღონისძიება მსოფლიო მეწარმეობის კვირეულის ფარგლებში ამერიკის საელჩოს, G4G-ის, USAID-ის და Crystal MFO-ს მხარდაჭერით გაიმართა.

ენდრიუ თორნჰილი საქართველოში 10 წლის წინ, 2007 წელს ჩამოვიდა და ფინანსურ კომპანიებთან საკონსულტაციო კუთხით თანამშრომლობა დაიწყო. 2017 წელს ციფრული ვალუტის სავაჭრო გლობალური პლატფორმა — Spotcoin-ი დააარსა, რომლის ფარგლებშიც ამერიკელი პარტნიორებისგან 1 მილიონი აშშ დოლარის ინვესტიცია მოიზიდა. Spotcoin-ის მისია ციფრული fiat-ვალუტის ტრანზაქციების პლატფორმის შექმნა და საქართველოს მსოფლიო ICO-ების რუკაზე მონიშვნაა. თორნჰილის საკონსულტაციო პორტფოლიო საქართველოში ფინანსური ტექნოლოგიების მიმართულებით განხორციელებულ სამუშაოებს მოიცავს, რომელთა კომპანიების, სისტემების და პროგრამების დანერგვის შედეგად მილიარდ აშშ დოლარამდე ტრანზაქცია განხორციელდა.

მსოფლიო სტარტაპერების კომუნა Startup Grind-ი მეწარმეების განათლებას, შთაგონებას და კომუნიკაციას ემსახურება. ის ტარტაპ-ღონისძიებების უმსხვილეს ქსელს მოიცავს, 300 ქალაქსა და 115 ქვეყანაში მილიონზე მეტი მონაწილით. Startup Grind-ის სხვადასხვა ქვეყნის წარმომადგენლობები ყოველთვიურად წარმატებულ სტარტაპერებს და ინვესტორებს მასპინძლობენ და მათ საკუთარ გამცდილებებს უზიარებენ. კომპანია დერეკ ანდერსონმა და სპენსერ ნილსენმა დააარსეს, 2010 წლის თებერვალში, კალიფორნიის ქალაქ მაუნთეინ ვიუში მდებარე პატარა ოფისში — მსოფლიო სტარტაპერების გაცნობის და დამეგობრების მიზნით.