დარიალის ხეობაში, სადაც მოვარდნილმა ღვარცოფმა საავტომობილო გზის 800-მდე მეტრის მონაკვეთი წაიღო, აღდგენითი სამუშაოები დღესაც გრძელდება. სპეციალისტების განმარტებით, სამუშაოები კიდევ მინიმუმ 2 დღეს გაგრძელდება.

გარემოს ეროვნული სააგენტოს სპეციალისტის, ვაჟა საბაურის განმარტებით, მიმდინარეობს 24 საათიანი მონიტორინგი. მისი თქმით, დილის 7 საათიდან ტექნიკამ უკვე დაიწყო მუშაობა:

"დღემ სტაბილურად ჩაიარა, ღამემაც სტაბილურად ჩაიარა. დღესაც არ ველოდებით დიდი ნალექს. გარემოს ეროვნულ სააგენტოს 2 პოსტი აქვს: ერთი მყინვარის ძირში, მეორე მდინარე დევდორაკის შუაწელზე. ვაკონტროლებთ წყლის დონეს და საშიშროების შემთხვევაში ვაცხადებთ განგაშს და ევაკუაციას".

შინაგან საქმეთა სამინისტროს ინფორმაციით კი, ვინაიდან დაზიანებულ გზის მონაკვეთზე გადაადგილება შეუძლებელია, 60 მოქალაქე, რომელიც რუსეთის ფედერაციის მიმართულებით გადაადგილდებოდა, ლარსის გამშვებ პუნქტამდე შსს-მ ვერტმფრენებით ჩაიყვანა.

23 ივნისს 18:00 საათზე, მცხეთა-სტეფანწმინდა-ლარსის საავტომობილო გზის დარიალის ხეობაში სტიქიური პროცესების გააქტიურების გამო, კმ134-კმ135 მონაკვეთზე, საშიშ ზონაში აიკრძალა ყველა სახის ავტოტრანსპორტის მოძრაობა.

ძლიერი წვიმების შედეგად, დევდორაკის ხეობიდან მოვარდნილმა ღვარცოფმა გადაკეტა მდინარე თერგის კალაპოტი, რის შედეგადაც მდინარე თერგმა შეიცვალა მიმართულება და მოვარდნილმა წყალმა წაიღო მცხეთა-სტეფანწმინდა-ლარსის საავტომობილო გზის დაახლოებით 800 მეტრიანი მონაკვეთი.