საქართველოს შინაგან საქმეთა სამინისტროს ინფორმაციით, სამცხე-ჯავახეთის პოლიციის თანამშრომლებმა 2017 წლის ოქტომბერ-ნოემბერში ხე-ბუჩქნარის უკანონო ჩეხვის ფაქტზე 11 პირი გამოავლინეს.

"სამართალდამცველებმა ბორჯომის, ადიგენის, ნინოწმინდის, ახალციხის და ასპინძის რაიონებში, მხილებულების ავტომანქანებიდან, უკანონოდ მოპოვებული ხის მრგვალი მორები და სამასალე ფიცრები ამოიღეს, გამოვლენილი ავტომანქანები კი დალუქეს", - აცხადებენ შსს-ში.

უწყებაში აღნიშნავენ, რომ ამოღებული ხის მასალა გადაგზავნილია შესაბამის ექსპერტიზაზე.

საქმეზე გამოძიება სისხლის სამართლის კოდექსის 303-ე მუხლის პირველი ნაწილით მიმდინარეობს. ამ მუხლით, ხე-ბუჩქნარის უკანონო ჩეხვა, რამაც გამოიწვია მნიშვნელოვანი ზიანი ისჯება ჯარიმით ან გამასწორებელი სამუშაოთი ვადით ერთ წლამდე ან/და თავისუფლების აღკვეთით ვადით სამ წლამდე.