ზუგდიდის მუნიციპალიტეტის მერიის პრესსამსახური ინფორმაციას ავრცელებს, რომ ქეთევან წამებულის ნაწილები უკვე მათ მუნიციპალიტეტშია. უწყებაში აღნიშნავენ, რომ ქალაქის ცენტრალურ მოედანზე დედოფლის ნაწილებს ზუგდიდის მუნიციპალიტეტის მერი ლაშა გოგია, ზუგდიდის მუნიციპალიტეტის საკრებულოს თავმჯდომარე მამუკა წოწერია, ადგილობრივი თვითმმართველობის წარმომადგენლებთან და მრევლთან ერთად დახვდა.

"წმინდა ნაწილები ივერიის ყოვლადწმინდა ღვთისმშობლის სახელობის მშენებარე ტაძარში გადააბრძანეს, სადაც ზუგდიდისა და ცაიშის მიტროპოლიტმა მეუფე გერასიმემ პარაკლისი აღავლინა", - აღნიშნავენ ზუგდიდის მუნიციპალიტეტის მერიაში.

მათივე თქმით, 20 ნოემბერს ქეთევან წამებულის წმინდა ნაწილებს სენაკისა და ჩხოროწყუს ეპარქიაში გადაინაცვლებს.

ინდოეთიდან საქართველოში წმინდანად შერაცხული ქეთევან დედოფლის ნაწილების ექვსი თვით საქართველოში ჩამოტანისთვის 343 310 ლარი გამოიყო.

10 აგვისტოს კულტურის სამინისტროს მიერ გავრცელებულ განცხადებაშია ნათქვამი, რომ დაგეგმილია ქეთევან დედოფლის ნეშთის ნაწილების საქართველოს რეგიონებში მოგზაურობა, გამოფენების მოწყობა და საერთაშორისო კონფერენციების ჩატარება.

დედოფლის ნეშტის რეგიონებში ტრანსპორტირებას, საპატრიარქოს ჩართულობით, კულტურისა და ძეგლთა დაცვის და საგარეო საქმეთა სამინისტროები უზრუნველყოფენ. უწყების ცნობით, ეროვნული მუზეუმის გარდა, ქეთევან დედოფლის ნეშტის ნაწილებს გადაასვენებენ სამების ტაძარში.