ერთიან ნაციონალურ მოძრაობაში ამბობენ, რომ თბილისის მერიის უსაფრთხოების სამსახურის ახალი უფროსი, ნუგზარ ჭონქაძე სიძულვილის ენით გამოირჩევა. პარტიაში ამბობენ, რომ ჭონქაძე სოციალურ ქსელში სულიკო კედელაშვილის სახელით იყო დარეგისტრირებული და ჰომოფობიურ და ქსენოფობიურ განცხადებებს ასე აგრძელებდა.

"ეს ადამიანი გამოირჩევა თავისი ქსენოფობიური და ჰომოფობიური. ეს არის ადამიანი, რომელიც გამოირჩევა სიძულვილის ენით და განსაკუთრებული აგრესიულობით ყველა იმ ადამიანის მიმართ, რომელიც განსხვავებულ აზრს გამოთქვამს. ყველა იმ ოპოზიციური პარტიის მიმართ და წევრების მიმართ, რომლებიც აფიქსირებენ ამ ხელისუფლებისგან განსხვავებულ პოზიციას", - განაცხადა თბილისის საკრებულოს წევრმა ნაციონალური მოძრაობიდან ირაკლი ნადირაშვილმა.

თბილისის ახალი მერი, კახა კალაძე, რომელმაც ჭონქაძე თანამდებობაზე დანიშნა ამბობს, რომ მის მიერ შერჩეული კადრი დაკისრებულ მოვალეობებს კარგად შეასრულებს. მერი ამბობს, რომ მისი დანიშვნის შესახებ გადაწყვეტილების გადახედვას არ გეგმავს.

"წლების განმავლობაში მუშაობდა სახელმწიფო უსაფრთხოების სამსახურში, წლების განმავლობაში მუშაობდა ფინანსურ პოლიციაში, წლების განმავლობაში იყო პროგრეს ბანკის უსაფრთხოების ხელმძღვანელი. სხვა რომელ წარსულზე მელაპარაკებით? არის ჩოხოსანი, არის კარგი თამადა", - თქვა კალაძემ ჭონქაძეზე.

კახა კალაძემ საქალაქო სამსახურების ხელმძღვანელის თანამდებობებზე კანდიდატები გუშინ, 15 ნოემბერს დაასახელა. ისინი თანამდებობაზე თბილისის საკრებულომ უნდა დაამტკიცოს.