ყვარელში მღვდლებმა ვერტმფრენიდან სკოლის მოსწავლეები დალოცეს და კანფეტები გადაუყარეს. ინფორმაცია ამის შესახებ Reginfo-მ გაავრცელა.

როგორც ერთ-ერთმა სასულიერო პირმა, მამა იოანემ გამოცემას უთხრა, ვერტმფრენით მათ სასაზღვრო პოლიცია დაეხმარა:

"სკოლის დირექტორებს ვთხოვეთ, რომ ბავშვები გარეთ ყოფილიყვნენ, კანფეტები ჩავუყარეთ და დავლოცეთ. მომავალ წელს სხვა სკოლებში ჩავყრით კანფეტებს და ვაკურთხებთ."

On.ge ინფორმაციის გადამოწმებას ნეკრესის ეპარქიის მიტროპოლიტთან და პატრიარქის პრესმდივანთან შეეცადა, თუმცა ისინი ზარებს არ პასუხობენ.

ამ დრომდე პასუხი არ მიუღია On.ge-ს სასაზღვრო პოლიციიდანაც, სადაც ამბობენ, რომ ინფორმაციას აზუსტებენ.

განახლება: ყვარელში სპეციალური დანიშნულების ვერტმფრენით მღვდლების გადაყვანისთვის სასაზღვრო პოლიციის ერთ-ერთი მაღალჩინოსანი დაითხოვეს.