ენერგეტიკის მინისტრის განცხადებით, გრძელვადიანი უპროცენტრო განვადებით, 25 ლარის გადახდის შემთხვევაში, კომპანია სოკარი გაზს აბონენტის სახლში შეიყვანს. მისივე თქმით, გაზის დაერთების საფასური ადრე 600 ლარი იყო და ამჟამად 400 ლარია. ამის შესახებ, 9 მარტს, ორი კომიტეტის სხდომაზე ენერგეტიკის მინისტრმა სიტყვით გამოსვლისას განაცხადა.

კახი კალაძის განცხადებით, მთავრობის გადაწყვეტილებით, წელს გამოყოფილი 20 მილიონი ლარიდან, ადიგენის მუნიციპალიტეტის სოფელ აბასთუმნის გაზიფიცირება მოხდება.

დეპუტატის კითხვაზე, თუ რატომ არ აქვს დღემდე ადიგენის რაიონში არცერთ მოსახლეს გაზი, მათ შორის ორ სოფელში 2012 წელს მთავარი მილი უკვე გაყვანილი იყო, კალაძის თქმით, აბასთუმნის პროექტის დასრულების შემდეგ უკვე შესაძლებელი გახდება მიმდებარე სოფლების დაქსელვა და გაზიფიცირება.

მინისტრის განცხადებით, პრიორიტეტების მიხედვით, პირველ რიგში ოკუპირებული ტერიტორიების გამყოფ ხაზთან არსებულ სოფლებში შევიდა გაზი, შემდეგ ისეთ სოფლებში, სადაც მხოლოდ ცენტრალური მაგისტრალი იყო მიყვანილი.

"ჩვენ ვგეგმავთ რომ 2017 წლის ბოლოსთვის დავასრულოთ გაზიფიცირების სამუშაოები",- განაცხადა კახი კალაძემ.