დღეს, 23 თებერვალს პარლამენტის სასახლის ხარების სახელობის სამლოცველოში 1921 წელს კოჯორ-ტაბახმელასთან დაღუპულ ქართველ იუნკერთა სულის მოსახსენიებელი პანაშვიდი გაიმართება. პარლამენტის შიდა ეზოში იუნკრების ფოტოები გამოიფინება. ღონისძიებას პარლამენტის თავმჯდომარის მოადგილე მანანა კობახიძე, პარლამენტისა და მთავრობის წევრები, ასევე, იუნკერთა შთამომავლები და ჩოხოსნები დაესწრებიან.

1918 წლის 26 მაისს საქართველოს ეროვნული საბჭოს მიერ დამოუკიდებლობის გამოცხადებიდან სამ წელიწადში, 1921 წლის 12 თებერვალს რუსეთის წითელი არმია საქართველოში შემოიჭრა. თბილისის მისადგომებთან მე-11 არმიას ქართული ჯარი, სახალხო გვარდია და მოხალისეები აღუდგნენ წინ. გადამწყვეტი ბრძოლები კოჯორ-ტაბახმელასთან გაიმართა.

ქვეყნის დამოუკიდებლობისთვის რუსეთთან უთანასწორო ბრძოლაში არაერთი ქართველი მებრძოლი და იუნკერი დაიღუპა. გარდაცვლილთა შორის იყო პოეტ კონსტანტინე მაყაშვილის 20 წლის შვილი, მოწყალების და მარო მაყაშვილიც. იუნკერთა ნაწილი ალექსანდრე ნეველის სახელობის ტაძრის ეზოში ანუ ახლანდელი პარლამენტის შიდა ეზოშია დაკრძალული.

რუსეთის წითელი არმიის მიერ საქართველოს ოკუპაციიდან 95 წელი გავიდა.