"გამოძიება არის საგამოძიებო უწყებების საქმე. ჩვენი საქმე არის ის, რომ რადიკალურად გავზარდეთ საქართველოს ფოსტის მოგება", — ასე უპასუხა პრემიერმინისტრმა ირაკლი კობახიძემ საქართველოს ფოსტაში საგამოძიებო სამსახურის შესვლის საკითხზე დასმულ კითხვას.

"გამოძიება არის საგამოძიებო უწყებების საქმე. ჩვენი საქმე არის ის, რომ რადიკალურად გავზარდეთ "საქართველოს ფოსტის" მოგება. "საქართველოს ფოსტა" წლების განმავლობაში იყო წამგებიანი ორგანიზაცია და მას შემდეგ, რაც შეიცვალა მენეჯმენტი, ბატონი ერაძე დაინიშნა ხელმძღვანელად, რადიკალურად შეიცვალა პროცესები "საქართველოს ფოსტაში". ამან ფოსტას მოუტანა დამატებით მრავალმილიონიანი როგორც დანაზოგი, ისე ახალი შემოსავლები. შესაბამისად, წელს პირველად გადის "საქართველოს ფოსტა" მოგებაზე. გასული წელი დაიხურა, წარმოიდგინეთ, 7 მლნ-იანი წაგებით. წელს "საქართველოს ფოსტა" კეთილსინდისიერი და სწორი მენეჯმენტის პირობებში პირველად გავა მოგებაზე, ეს ტენდენცია შენარჩუნდება და კიდევ უფრო მეტად გაიზრდება მომდევნო წლების განმავლობაში", — აღნიშნა პრემიერმა.

მისივე თქმით, "მუდმივი პროცესია მენეჯმენტის ეფექტიანობის გაუმჯობესება". მან კიდევ ერთხელ გაიმეორა, რომ წელიწადნახევარი დასჭირდა მას პრემიერის თანამდებობაზე დანიშვნიდან იმისათვის, რომ ბევრი რამ გამოევლინა.

"დაახლოებით წელიწადში და ხუთ თვეში, გასული წლის ივნისისთვის დასრულდა პროცესების გადალაგება, როცა ჩვენ მოვახერხეთ ყველაფერში ჩახედვა, როცა ჩვენ მოვახერხეთ საკადრო ცვლილებების განხორციელება. ამას დასჭირდა თავისი დრო, იყო პრობლემები, პრობლემები იქნა დაძლევადი, ჩვენთვის მთავარი ეს არის. რაც შეეხება წარსულს, თუ რაიმე არის გამოსაძიებელი, ამას გააკეთებენ შესაბამისი უწყებები. ჩვენი საქმე არის ის, რომ მთლიანად ვასუფთავებთ პროცესებს", - დასძინა მან.

ჟურნალისტის ჩაკითხვაზე, მისი წინამორბედის [ირაკლი ღარიბაშვილის] დროს იყო თუ არა კორუფციასთან ბრძოლა, კობახიძემ აღნიშნა, რომ იყო.

"რა თქმა უნდა, იყო. მე ვიტყოდი ასე, რომ იყო რამდენიმეწლიანი მონაკვეთი, როდესაც ასეთი ტიპის პრობლემამ იჩინა თავი. მანამდეც არ იყო ასეთი ტიპის პრობლემები ძალიან ბევრი წლის განმავლობაში და გარკვეული წლები იყო, დაახლოებით 2-წლიანი პერიოდი იყო, როდესაც გარკვეულმა პრობლემებმა სისტემურად იჩინა თავი. როგორც კი გამოვლინდა ასეთი პრობლემები, სისტემური სახით, მაშინვე ჩავერიეთ, გაკეთდა განაცხადი ბატონი ბიძინა ივანიშვილის მხრიდან, მკაფიო მინიშნება იმასთან დაკავშირებით, რომ ის ხედავდა გარკვეულ პრობლემებს, რასაც სჭირდებოდა დაძლევა, მოგვარება და ჩვენ მყისიერად დავიწყეთ ამაზე მუშაობა.

როდესაც ქვეყნის გარედან მძიმე ზეწოლაა, რთულია, რამდენიმე მიმართულებით ერთდროულად კონცენტრირება. ჩვენ იმდენად ვიყავით დაკავებულები არა ბრძოლით, არამედ თავდაცვით, იმ თავდასხმების მიმართ, რაც ხორციელდებოდა გარედან, რომ ყველაფერზე კონცენტრირება იყო რთული. დღეს სახელმწიფო არის ძლიერი, როგორც არასდროს, შესაბამისად, ჩვენ გვაქვს იმის ფუფუნება, რომ თანაბრად ვიყოთ კონცენტრირებულები როგორც გარე თავდასხმების მოგერიებაზე, ისე ქვეყნის შიგნით კორუფციასთან ბრძოლაზე. კორუფცია არის პრინციპულად აღმოფხვრილი არა მხოლოდ ზედა ეშელონებში, არამედ, წამყვან სახელმწიფო უწყებებში, სახელმწიფო საწარმოებში, რაც შეეხება ქვედა დონის კორუფციას, ნებისმიერ ქვეყანაში აქ მუდმივი ბრძოლაა საჭირო“, - განაცხადა პრემიერმა.