მას შემდეგ რაც კევინ სპეისი ენტონი რაპმა სექსუალურ შევიწროებაში დაადანაშაულა, მსახიობის გარშემო ყოველ დღე ახალ-ახალ ამბავს ვიგებთ.

მაგალითად, ცოტა ხნის წინ სხვადასხვა გამოცემებმა გაავრცელეს ცნობა, რომ House of Cards, შესაძლოა, სპეისის პერსონაჟის, ფრენკ ანდერვუდის გარეშე გაგრძელდეს ან სხვა მსახიობით ჩაანაცვლონ.

ერთ-ერთი პირველი, ვინც ამ თემას გამოეხმაურა მსახიობი ჯესიკა ჩესტეინი იყო, რომელმაც თქვა, რომ უმჯობესი იქნება, თუ მთელი სერიალი ახლა რობინ რაითზე გადაეწყობა და შოუს მთავარ პერსონაჟადაც კლერ ანდერვუდი მოგვევლინება.

ამავდროულად, ნეტფლიქსის სერიალის მაყურებელმა ხელმოწერების შეგროვება დაიწყო და ითხოვენ, რომ House of Cards-ში კევინის ნაცვლად მსახიობი კევინ ჯეიმსი აიყვანონ.

კევინ ჯეიმსი

კევინ ჯეიმსი

შეგახსენებთ, რომ სპეისის სკანდალის შემდეგ, საერთაშორისო სატელევიზიო აკადემიამ ოფიციალური განცხადება გაავრცელა, სადაც ამბობდნენ, რომ დაგეგმილი ღონისძიება, რომელზეც კევინ სპეისის საპატიო ემის გადასცემდნენ, აღარ გაიმართება.

სპეისის პრეს-აგენტმა კი New York Times-ს მისწერა, "კევინ სპეისის სჭირდება დრო სიტუაციის შესაფასებლად და სამკურნალოდ. ამ ეტაპზე სხვა ინფორმაცია ხელმისაწვდომი არ არის."

ცნობილი გახდა ისიც, რომ კევინ სპეისი სექსუალურ შევიწროებაში House of Cards-ის რვა თანამშრომელმა და ორმა სხვა პირმა დაადანაშაულა. მას დაუხურეს სალექციო კურსი, მიატოვა აგენტმა და CAA-დანაც გამოუშვეს. გუშინ კი ბანქოს სახლის ახალი პრომო პოსტერი გავრცელდა, სადაც კევინ სპეისის პერსონაჟი ამოშალეს. ახალ ფოტოზე მხოლოდ რობინ რაითის პერსონაჟი, კლერ ანდერვუდია გამოსახული.

გაიგეთ მეტი: კევინ სპეისის საქმე.