2017 წელს, 2012 წელთან შედარებით, საქართველოში ორგანიზებული დანაშაულის ინდექსის მაჩვენებელი 37 პოზიციით გაუმჯობესდა და ქვეყანამ 75-დან 38-ე ადგილზე გადაინაცვლაამ. ინფორმაციას შინაგან საქმეთა სამინისტრო მსოფლიო ეკონომიკური ფორუმის გლობალური კონკურენტუნარიანობის შესახებ ყოველწლიურ ანგარიშზე დაყრდნობით ავრცელებს.

ანგარიშის მიხედვით, ბოლო ხუთი წლის განმავლობაში, 26 პოზიციით გაუმჯობესდა დანაშაულისა და ძალადობის გამო ბიზნესისთვის მიყენებული ფინანსური ზარალის ინდექსი, საქართველომ 56-ე პოზიციიდან 30-ე ადგილზე გადმოინაცვლა.

მოცემულ ანგარიშში, პოლიციისადმი ნდობის ხარისხის ინდიკატორის მიხედვით, საქართველო 42-ე პოზიციას იკავებს და რეგიონში საუკეთესო მაჩვენებელი აქვს. გარდა ამისა, 2014 წელთან შედარებით, კიბერუსაფრთხოების ინდექსის მაჩვენებელი 4 პოზიციით გაუმჯობესდა და ქვეყანამ მე-8 ადგილზე გადმოინაცვლა.

მსოფლიო ეკონომიკური ფორუმის გლობალური კონკურენტუნარიანობის ანგარიშის შემუშავება ხდება საერთაშორისო ორგანიზაციების სტატისტიკებზე დაყრდნობით, მათ შორისაა, საერთაშორისო სავალუტო ფონდი, მსოფლიო ბანკი და ევროკავშირის სხვადასხვა სპეციალიზებული სააგენტო, როგორიცაა: საერთაშორისო ტელეკომუნიკაციის კავშირი, იუნესკო და მსოფლიო ჯანდაცვის ორგანიზაცია, ასევე, ბიზნესსექტორის წარმომადგენლების გამოკითხვის საფუძველზე. აღნიშნულ ანგარიშში შეფასებულია 137 ქვეყანა სხვადასხვა ინდიკატორის მიხედვით, რომელთაც გარკვეული ზეგავლენა აქვთ ამა თუ იმ ქვეყნის ეკონომიკის გრძელვადიან განვითარებაზე.