პარტია გახარია საქართველოსთვის წევრმა, შალვა კერესელიძემ პარლამენტის პლენარულ სხდომაზე ჭიათურელი მაღაროელების პრობლემებზე ისაუბრა. კერესელიძემ მთავრობას მოუწოდა, მოისმინოს ჭიათურის მოსახლეობის წუხილი, მაღაროელების გასაჭირი და მათი
სამართლიანი პროტესტი.

"ჩემი დღევანდელი პოლიტგანცხადება მინდა დავიწყო მოწოდებით და მოთხოვნით
საქართველოს ხელისუფლების, საქართველოს პრეზიდენტის, მთავრობის და პარლამენტის
მიმართ რათა მოისმინოთ ჭიათურის მოსახლეობის წუხილი, მაღაროელების გასაჭირი და მათი სამართლიანი პროტესტი. ისინი ითხოვენ:

• დაპატიმრებული ჭიათურელი მაღაროელების გიორგი ნეფარიძის, მერაბ სარალიძის, თენგიზ გველესიანისა და აჩიკო ჭუმბურიძის განთავისუფლებას;

• შრომის რეალურ ანაზღაურებას, რის გამოც 3500 კაციდან 2000-ზე მეტი დასაქმებული მაღაროელი შემოსავლის გარეშე დარჩა;

• ითხოვენ რთული და მაღალი რისკის სამუშაო პირობებიდან გამომდინარე შრომის უსაფრთხოების ნორმების მკაცრად დაცვას;

• ნედლეულის მიწისქვეშა წესით მოპოვებას, ვინაიდან ჭიათურაში დღეს უკვე სახეზეა
ამოწურული რესურსები და თითქმის სრულად ათვისებული ღია კარიერები, მოსახლეობისგან
დაცლილი და დანგრეული სოფლები, დაბზარული სახლები, იმედგაცრუებული ახალგაზრდობა, გაზრდილი მიგრაცია, დაბინძურებული გარემო და განადგურებული ინფრასტრუქტურა.

ჭიათურელი მაღაროელები სამართლიანი მოთხოვნების დაკმაყოფილების გამო, უწყვეტად
მართავდნენ აქციებს ჭიათურაში და სხვა და სხვა სახელმწიფო უწყებებთან, მაგრამ მათი
მოთხოვნები და გასაჭირი ყურად არავის არ იღო. მინდა ყველას შეგახსენოთ, რომ ჭიათურა
მონოინდუსტრიული ქალაქია, სადაც მოსახლეობის უმეტესობა დამოკიდებულია მხოლოდ ერთ საწარმოზე და ამ საწარმოს მიღმა, სამწუხაროდ დასაქმებისა და შემოსავლის ალტერნატიული წყაროები პრაქტიკულად არ არსებობს. ასევე შეგახსენებთ იმასაც, რომ ჭიათურის მოსახლეობის 60% მეტი სოციალურად დაუცველთა ბაზაშია რეგისტრირებული და მუნიციპალიტეტის მოსახლეობის მესამედი საარსებო შემწეობის მიმღებია," — განაცხადა კერესელიძემ.

კერესელიძის განცხადებით, სესიის დასრულების შემდეგ პარტია მიხეილ ყაველაშვილს პატიმრობაში მყოფი ჭიათურელი მაღაროელების შეწყალების შუამდგომლობით მიმართავს.

"გაანთავისუფლეთ პატიმრობიდან დაკავებული მაღაროელები გიორგი ნეფარიძე, მერაბ სარალიძე, თენგიზ გველესიანი და არჩილ ჭუმბურიძე. დამერწმუნეთ, ამ ნაბიჯის გადადგმის შემდეგ, ამაყად გექნებათ უფლება თამამად ისაუბროთ საკუთარი ქვეყნის და ხალხის წინაშე
დეპოლარიზაციასა და ქვეყანაში ნამდვილი მშვიდობის დამყარებაზე.

პრეზიდენტის სახელზე, ფრაქცია საქართველოსთვის საპარლამენტო დეპუტატების მიერ
მომზადებული ოფიციალური შუამდგომლობა დაპატიმრებული მაღაროელების შეწყალების
შესახებ, მომდინარეობს საზოგადოების მაღალი ინტერესებიდან გამომდინარე რომელიც
მიმართულია მაღაროელთა უფლებების დაცვასა და ქვეყანაში სტაბილურობის
შენარჩუნებისაკენ. ჩვენს მიერ მომზადებულ შუამდგომლობას მაღაროელების შეწყალების
შესახებ, პრეზიდენტს გავუგზავნით მიმდინარე სესიის დასრულების თანავე," — განაცხადა კერესელიძემ.

შეგახსენებთ, მაღაროელებს 28 აპრილის ღამეს მომხდარი ინციდენტის გამო ედავებოდნენ, როდესაც პროტესტის მონაწილეები და შუქრუთის მაღაროს დირექტორი, თენგიზ კობერიძე ერთმანეთს დაუპირისპირდნენ.

ჯგუფური ძალადობის ორგანიზებით და მასში მონაწილეობისთვის დაკავებულ გიორგი ნეფარიძეს და მერაბ სარალიძეს 6 წლითა და 3 თვით პატიმრობა მიესაჯათ.

ჯგუფურ ძალადობაში მონაწილეობის ბრალდებით დაკავებულ არჩილ ჭუმბურიძეს და თენგიზ გველესიანს 4 წლითა და 3 თვით თავისუფლების აღკვეთა მიესაჯათ.