ზესტაფონი-ქუთაისის გზაზე მომხდარი ავტოსაგზაო შემთხვევის შედეგად 13 ადამიანი დაშავდა, მათ შორის არასრულწლოვნები არიან.

შემთხვევის შედეგად ერთ-ერთმა მგზავრმა იდაყვის სახსრიდან კიდური დაკარგა. ზესტაფონის კლინიკა "ფერომედის" რეანიმაცია-ანესთეზიის სამსახურის ხელმძღვანელის, თამარ მახათაძის განცხადებით, დანარჩენი 5 დაშავებული უკრაინელია და ერთ-ერთი კლინიკაში წელის მალების მოტეხილობით შეიყვანეს.

"უმძიმეს მდგომარეობაში შემოიყვანეს ახალგაზრდა ბიჭი, რომელსაც ჰქონდა მარჯვენა ზედა კიდურის სრული ამპუტაცია, იდაყვის სახსარში. ოპერაცია წარმატებით ჩატარდა, პაციენტი გადმოყვანილია რეანიმაციულ განყოფილებაში.

დანარჩენი ხუთი ავადმყოფიდან, რომელიც როგორც ვიცი, უკრაინელები არიან, ახალგაზრდა მამაკაცს და ქალბატონს წელის არეში აქვთ წელის მალების განივი მორჩების მოტეხილობა. ერთ ქალბატონს აქვს მხრის ძვლის მოტეხილობა, ცდომის გარეშე, ორი ქალბატონი არის დაჟეჟილობებით," — განუცხადა ზესტაფონის კლინიკა "ფერომედის" რეანიმაცია-ანესთეზიის სამსახურის ხელმძღვანელმა, თამარ მახათაძემ "რუსთავი 2"-ს.

შინაგან საქმეთა სამინისტროში ინფორმაციით, მომხდარზე გამოძიება საქართველოს სისხლის სამართლის კოდექსის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესების დარღვევას გულისხმობს.