ჟენევაში საერთაშორისო დისკუსიების 67-ე რაუნდი გაიმართა, რომელშიც საქართველოს, რუსეთის ფედერაციის, აშშ-ის და ოკუპირებული აფხაზეთისა და ცხინვალის რეგიონის საოკუპაციო რეჟიმების წარმომადგენლები მონაწილეობდნენ. შეხვედრა გაეროს, ეუთოსა და ევროკავშირის თანათავმჯდომარეობით ჩატარდა.

შეხვედრის დასრულების შემდეგ, რუსეთის საგარეო საქმეთა სამინისტრომ ოფიციალური განცხადება გაავრცელა, სადაც მოსკოვი კვლავ ცდილობს თბილისს ოკუპირებულ სოხუმთან და ცხინვალთან ძალის არგამოყენების შესახებ იურიდიულად სავალდებულო დოკუმენტის გაფორმება აიძულოს და ამით საოკუპაციო რეჟიმებს "სუვერენული რესპუბლიკების" სტატუსი მიანიჭოს. კრემლი ასევე უკმაყოფილებას გამოთქვამს NATO-საქართველოს სამხედრო თანამშრომლობისა და გაეროში დევნილთა შესახებ მიღებული რეზოლუციის გამო.

"...რუსულმა მხარემ დაჟინებით მოუწოდა — დისკუსიების არსებული მანდატის შესაბამისად — მიღებულ იქნას პრაქტიკული ზომები, რომლებიც უზრუნველყოფენ აფხაზეთისა და სამხრეთ ოსეთის მყარ უსაფრთხოებას. საუბარია საქართველოსა და ორ სუვერენულ რესპუბლიკას [საოკუპაციო რეჟიმებს] შორის ძალის არგამოყენების შესახებ იურიდიულად სავალდებულო შეთანხმების შემუშავებაზე. მისი გაფორმება არა მხოლოდ საგრძნობ იმპულსს მისცემდა საერთაშორისო დისკუსიების ეგიდით მიმდინარე მოლაპარაკების პროცესს, არამედ მნიშვნელოვანი წვლილი იქნებოდა მთლიანად რეგიონში სტაბილურობის განმტკიცების საქმეში.

რუსეთისა და მისი აფხაზი და ოსი მოკავშირეების [საოკუპაციო რეჟიმების] მიერ შემოთავაზებული ნაბიჯების აქტუალობა იზრდება NATO-ს ბლოკსა და საქართველოს შორის თანამშრომლობის შემდგომი გაფართოების ფონზე, რაც მოიცავს ამ აგრესიული ალიანსის მიერ ამიერკავკასიის ქვეყნის ტერიტორიაზე სწავლებებისა და სხვა სამხედრო-საწვრთნელი ღონისძიებების ჩატარებას.

რუსულმა მხარემ კმაყოფილებით აღნიშნა "ადგილზე" არსებული შედარებით მშვიდი ვითარება, რაც საერთაშორისო დისკუსიების არსებული მოლაპარაკებების არხების სტაბილური მუშაობის დამსახურებაა. ეს მოიცავს რიტმულად ჩატარებულ რაუნდებს, 24-საათიან რეჟიმში მოქმედ "ცხელ ხაზებსა" და საქართველო-სამხრეთ ოსეთის საზღვარზე [საოკუპაციო ხაზთან], დასახლებულ პუნქტ ერგნეთში, ინციდენტების პრევენციისა და მათზე რეაგირების მექანიზმის (IPRM) ფარგლებში რეგულარულად გამართულ შეხვედრებს. ხაზი გაესვა საქართველო-აფხაზეთის საზღვარზე [საოკუპაციო ხაზთან], დასახლებულ პუნქტ გალში, ანალოგიური მექანიზმის მუშაობის აღდგენის აუცილებლობას, ისევე როგორც აფხაზეთთან და სამხრეთ ოსეთთან საქართველოს სახელმწიფო საზღვრის დელიმიტაციის [ე.წ. საზღვრების ბორდერიზაციის] პროცესის დაწყებას.

აქცენტი გაკეთდა თბილისის მხრიდან ჰუმანიტარული დღის წესრიგის ცალკეული საკითხებით მიმდინარე სპეკულაციების დაუშვებლობაზე, რაც სერიოზულად აფერხებს კონსტრუქციული დიალოგის ჩამოყალიბებას საერთაშორისო დისკუსიების ამ მნიშვნელოვან სეგმენტში. მორიგი რაუნდის წინა დღეს კვლავ იქნა მიღებული საქართველოს მიერ ყოველწლიურად წარდგენილი, უკიდურესად პოლიტიზებული გაეროს გენერალური ასამბლეის რეზოლუცია იძულებით გადაადგილებულ პირთა და ლტოლვილთა შესახებ. ეს გაკეთდა იმ არსებული შეთანხმებების დარღვევით, რომლებიც ითვალისწინებს აღნიშნული თემატიკის განხილვას საერთაშორისო დისკუსიების ფარგლებში და არა სხვა პლატფორმებზე, სადაც სოხუმისა და ცხინვალის წარმომადგენლებს არ აქვთ წვდომა და, შესაბამისად, მოკლებულნი არიან შესაძლებლობას, ქართულ მხარესთან ღია პოლემიკაში დაიცვან თავიანთი კანონიერი ინტერესები.

მიღწეულია წინასწარი შეთანხმება საერთაშორისო დისკუსიების მორიგი რაუნდის მიმდინარე წლის ნოემბერში გამართვის შესახებ. დამკვიდრებული პრაქტიკის მიხედვით, სესიას წინ უძღვის ეროვნული დელეგაციების კონსულტაციების სერია თანათავმჯდომარეებთან დედაქალაქებში", — წერია უწყების განცხადებაში.

ჟენევის საერთაშორისო დისკუსიების მორიგი, 68-ე რაუნდი 2026 წლის ნოემბერში იგეგმება.