კოალიცია ცვლილებისთვის ერთ-ერთი ლიდერი ელენე ხოშტარია რუსთავის N5 პენიტენციური დაწესებულებიდან საზოგადოებას მიმართავს. ოპოზიციონერი პოლიტიკოსი მადლობას უხდის მხარდამჭერებს და სოლიდარობას უცხადებს კრიტიკულ მედიას, კერძოდ პროკურატურაში დაბარებულ ჟურნალისტ დავით ქაშიაშვილს.

ხოშტარია აღნიშნავს, რომ მიუხედავად შექმნილი ვითარებისა, მმართველი გუნდი მას სუსტ პოზიციაში ვერ დაინახავს.

"პირველ რიგში, ძალიან დიდი მადლობა მინდა გითხრათ, ასეთი მხარდაჭერისთვის. პირდაპირ, რომ გითხრათ, მორიდებულადაც კი ვგრძნობ თავს, რაღაცნაირად მრცხვენია, რომ ჩემს გამო ასე შეწუხდით. დღეს, იქ, სამინისტროსთან რომ ყოფილა შეკრება, დავინახე ქალბატონი ლანა ღოღობერიძე და მთლად დავიწვი სირცხვილით. მართლა ძალიან მერიდება, რომ რაღაც ელემენტარულ საკითხზე ესე წუხდებიან ადამიანები.

მაგრამ მინდა ყველამ ძალიან კარგად იცოდეს, რომ არ არსებობს მდგომარეობა, როდესაც მე რომელიმე ქოცი, ბიძინადან დაწყებული პატარა ზარქუათი დამთავრებული, როდესაც ისინი მე დამინახავენ მსხვერპლის როლში. არ არსებობს! ვერც დამინახავენ, ვერც კამერაში, ვერაფერში ვერ დამინახავენ. ძალიან კარგად ვარ. აუტანელი არის არა ტკივილი — ამასაც ავიტან და უარესსაც ავიტან. აუტანელი არის, როდესაც შენი სიცოცხლე, ჯანმრთელობა, ღირსება, სიმართლე უბრალოდ აღარ ფასობს ამ ქვეყანაში და ეს უნდა გამოვასწოროთ ჩვენ. დანარჩენი, არ ვიცი, მეცინება ცოტა ისეთი სიტყვაა, მაგრამ მართლა ძალიან მძიმეა, როდესაც გაუფასურებულია ყველაფერი. მაგრამ შეხედეთ მეორე მხრიდან — რეების კეთება უწევთ იმისთვის, რომ რაღაცა შემოატრიალონ სათავისოდ სიტუაცია და არაფერი არ გამოსდით, არაფერი!", — განაცხადა ელენე ხოშტარიამ ციხიდან სატელეფონო საუბრისას.

პოლიტიკოსი ამბობს, რომ საპატიმროში მიმდინარე სამედიცინო კონსილიუმებსა თუ სხვა გადაწყვეტილებებზე არ ნერვიულობს და ბრძოლის გაგრძელებას აპირებს.

"აუცილებლად გავიმარჯვებთ, თორემ მართლა არ ვნერვიულობ, საერთოდ არ მადარდებს რას გადაწყვეტენ, საერთოდ. ახლა ჩემი შვილები მოდიან და არც კი მოვუსმენ, რაც უნდათ ის გადაწყვიტონ. ვერაფერს ვერ დამაკლებენ, აბსოლუტურად.

რა თქმა უნდა, უდიდესი მადლობა ქალბატონ მაკას, იოსელიანს, თავისი მშვენიერი გუნდით, ეგეც რომ ისე შეაწუხეს და რაც მთავარია, სრული მხარდაჭერა, სოლიდარობა "ქაშიკას", დათო ქაშიაშვილს. დღეს ის მიდის პროკურატურაში. საგანგაშოა ეს ფაქტი, რომ იბარებენ პროკურატურაში. ეს ახალი ეტაპია დევნის. ამიტომ სრული მხარდაჭერა პირადად "ქაშიკას", "ფორმულას", "ტვ პირველს", რომელიც ასევე მსხვერპლია, ხო? ისინიც დგანან დღეს წინა ხაზზე ბრძოლის და ვერაფერი ვერ გამოგვივიდოდა ისინი რომ არ ყოფილიყვნენ", — აღნიშნა ხოშტარიამ.

განცხადების დასასრულს ელენე ხოშტარია საზოგადოებას ერთიანობისა და კრიზისულ პერიოდში ერთმანეთის მხარდაჭერისკენ მოუწოდებს

"ერთმანეთს ყველაფერში უნდა დავუდგეთ გვერდში. მე ძალიან მადლობელი ვარ თქვენი გვერდში დგომით და არ ინერვიულოთ, რაც არ უნდა გადაწყვიტონ, საერთოდ არ ინერვიულოთ, ვერაფერს ვერ მოგვაკლებენ. რაც მთავარია, ერთმანეთს დავუდგეთ გვერდში ყველა კრიზისის დროს. დიუშენი იყო და გადატყდა. ტელევიზიებია და უნდა დავიცვათ. მე ვერაფერს ვერ დამაკლებენ, უნდა გავაგრძელოთ ერთმანეთის გვერდში დგომით", — თქვა ხოშტარიამ.

შეგახსენებთ, რომ პარტია "დროას" ლიდერ ელენე ხოშტარიას მხარდამჭერები დღეს პენიტენციურ სამსახურთან შეიკრიბნენ, სადაც მის მკურნალ ექიმთა ნმისი სამკურნალოდ კლინიკაში გადაყვანის საკითხი განიხილება.