დღეს, პარლამენტის ბიუროს სხდომას საკანონმდებლო ცვლილებები წარედგინება, რომელიც სიჩქარის გადაჭარბებისთვის ჯარიმების ცვლილებას ეხება. როგორც 19 ივნისს გამართულ ბრიფინგზე საპარლამენტო უმრავლესობის ლიდერმა, ირაკლი კირცხალიამ თქვა, წარმოდგენილი ცვლილებების თანახმად, სანქციების სისტემა გახდება უფრო დიფერენცირებული და პროპორციული.

• 15-დან 30 კმ/სთ-მდე სიჩქარის გადაჭარბება — 100 ლარის ნაცვლად იქნება 50 ლარი;
• 30-დან 40 კმ/სთ-მდე გადაჭარბება — უცვლელად 100 ლარი;
• 40-დან 50 კმ/სთ-მდე გადაჭარბება — 300 ლარის ნაცვლად 100 ლარი;
• 50 კმ/სთ-ზე მეტით გადაჭარბება — უცვლელად 300 ლარი.

აღნიშნულთან დაკავშირებით, პარლამენტის საპროცედურო საკითხთა კომიტეტის თავმჯდომარე, დავით მათიკაშვილი განმარტავს, რომ სახელმწიფოს მხრიდან მიდგომის შეცვლა წინა რეგულაციების პრაქტიკულმა უშედეგობამ განაპირობა.

"ჩვენ ვნახეთ, რომ კონკრეტულმა მაღალმა ჯარიმებმა პრევენციული თვალსაზრისით ის მაქსიმალური შედეგი ვერ გამოიღო, რომელიც იყო ნავარაუდები. შესაბამისად, მიდგომა ამ შემთხვევაში იცვლება სახელმწიფოს მხრიდან. კონკრეტული გრადაციით ხდება ჯარიმის ოდენობის შემცირება სიჩქარის გადაჭარბებაზე, თუმცა მაღალი სიჩქარის შემთხვევაში, მაშინ როდესაც ეს სცილდება დასაშვებ ნორმას, კვლავაც რჩება მაღალი სანქცია. ანუ, იქმნება ისეთი მოდელი, სადაც შესაძლებელია დაბალი სანქცირება მოხდეს ჩვენი თანამოქალაქეების. სახელმწიფო კვლავ აგრძელებს ამ კუთხით დაკვირვებას, ზოგადად, საავტომობილო გზებისა და სხვა მიმართულებით და იქნება აბსოლუტურად ადეკვატური იმ გამოწვევებთან დაკავშირებით, რაც იქნება ჩვენს საზოგადოებაში," — განაცხადა დავით მათიკაშვილმა ("პირველი არხი").

აღნიშნულ საკითხთან დაკავშირებით პარტია ხალხის ძალის წევრი, გურამ მაჭარაშვილი აღნიშნავს, რომ მიუხედავად მკაცრი სანქციების საჭიროებისა, ჯარიმების სისტემაში პროპორციულობისა და ადეკვატურობის დაცვა აუცილებელია.

"ჩვენ ამ საკითხთან დაკავშირებით გვქონდა როგორც პოლიტიკურ განცხადებებში, ასევე კომენტარებში პოზიცია, რომ, რა თქმა უნდა, ჯარიმები უნდა არსებობდეს, მათ შორის ჯარიმების გარკვეულ ოდენობამდე გაზრდაც... გასაგებია იმ მიზეზების გამო, რომ სამწუხარო რეალობა გვაქვს — 400-ზე მეტი ადამიანი იღუპება სიჩქარის გადაჭარბებით, ნასვამობით და ასე შემდეგ. თუმცა არსებობს გარკვეული პროპორცია, ადეკვატურობა და ამასთან დაკავშირებითაც გვქონდა ჩვენ პოზიცია, როდესაც გაიზარდა ეს ჯარიმები. ამდენად, კარგია, რომ ამ ეტაპზე გათვალისწინებულია ეს საკითხი და გარკვეული მიმართულებით ჯარიმები მცირდება", — განაცხადა გურამ მაჭარაშვილმა ("პირველი არხი").

• 100 ლარის ნაცვლად — 50, 300 ლარის ნაცვლად — 150 — სიჩქარის გადაჭარბებაზე ჯარიმები მცირდება