ქართული ოცნების დეპუტატი, კახა ოქრიაშვილს არ მოუკითხავს, თავისსავე პარტიაში ნეპოტიზმით ინიშნებიან თუ არა პირები თანამდებობაზე, თუმცა საკითხით დაინტერესებულია. ის საკითხის შესასწავლად On.ge-ს კვლევის ჩატარებისკენ მოუწოდებს.

ქართულ ოცნებაში ნეპოტიზმის ფაქტების მას შემდეგ გახდა აქტუალური, რაც პარტიის ერთ-ერთმა წევრმა, ზაქარია ქუცნაშვილმა რამდენიმე დღის წინ თქვა, რომ "კორუმპირებული და ლოთი" თამაზ მეჭიაური ნათესაური ნიშნით შეარჩია და პარლამენტის საფინანსო-საბიუჯეტო კომიტეტის თავმჯდომარის პოსტზეც ამიტომ გაუწია რეკომენდაცია.

On.ge დაინტერესდა ქართული ოცნების დეპუტატის პოზიციით აღნიშნულთან დაკავშირებით. დეპუტატების ნაწილს ტელეფონი გათიშული აქვს. რაც შეეხება კახა ოქრიაშვილს, ის გააღიზიანა On.ge-ს კითხვამ და ჟურნალისტს სიტყვიერი შეურაცხყოფა მიაყენა, შემდეგ კი ტელეფონი გათიშა.

On.ge გთავაზობთ ინტერვიუს სრულ ვერსიას, სტილი დაცულია.

სამშაბათს ზაქარია ქუცნაშვილმა ქართულ ოცნებაში თანამდებობებზე ნეპოტიზმით დანიშვნასთან დაკავშირებით ისაუბრა, თქვენ რა ინფორმაციას ფლობთ, ინიშნებიან პარტიაში ნეპოტიზმით ადამიანები?

კვლევა ჩაატარეთ, ჟურნალისტი თქვენ ხართ, ჩაატარეთ კვლევა და სტატისტიკა გაჩვენებთ.

თქვენ რა ინფორმაცია გაქვთ?

არ მაქვს მასეთი ინფორმაცია.

თუნდაც მას შემდეგ თუ მოიკითხეთ, რაც ქუცნაშვილმა განაცხადა?

კვლევა უნდა, ბატონო ჩემი, ჰაერზე ვიყვირო თუ რა?

მოიკითხეთ თუ არა პარტიაში [საკითხი]?

ჟურნალისტი ხართ, რაღაცა On.ge ხართ, აიღეთ, გააკეთეთ კვლევა, სად არის, რამდენია, რამდენი კაცი მუშაობს, ნათესაური კავშირი რამდენია. მერე წარმოგვიდგინეთ, მეც ძალიან მაინტერესებს, არის თუ არა ნეპოტიზმი. მე რა, გულთმისანი ვარ, ღმერთი ვარ, თუ რა?

თქვენი შეფასება როგორია, როცა პარტიის წევრი ყოფილ წევრზე ასე საუბრობს?

რაში მაინტერესებს, პასუხს არ მოგცემთ. პირიქით, თქვენ მე კითხვა დამისვით და მე გეკითხებით, რატომ არ გაქვთ [კვლევა]. დავუშვათ, ჟურნალისტებმა ჩაატარეთ რაღაცა გამოძიება, გააკეთეთ...

თქვენ როგორც პარტიის წევრს, არ გაინტერესებთ არის თუ არა პარტიაში ნეპოტიზმი?

როგორ არ მაინტერესებს, მაგრამ ჩემი სუბიექტური აზრი ვის რაში აინტერესებს?

თქვენ თუ აპირებთ, რომ [საკითხი] მოიძიოთ?

თქვენ ცოტა ვერა ხართ მატორზე, ტო. გელაპარაკები და ვერა ხარ, უტვინო ხარ, აღარ დამირეკო.

საიდან მოდის ოქრიაშვილი

ფარმაცევტული კომპანია PSP-ს დამფუძნებელი კახა ოქრიაშვილი 2004 წლიდან არის პარლამენტის წევრი. ის ყოველთვის დმანისის მაჟორიტარი დეპუტატის სტატუსით შედიოდა საკანონმდებლო ორგანოში, მაგრამ ამისთვის სამივე ჯერზე სხვადასხვა პოლიტიკური პლატფორმა გამოიყენა. 2004 წელს ის დმანისის მაჟორიტარად საინიციატივო ჯგუფმა წარადგინა, 2012-ში კი ის ამავე მუნიციპალიტეტის მაჟორიტარი ერთიანი ნაციონალური მოძრაობის დახმარებით გახდა.

არჩევნებიდან მალევე, ოქრიაშვილმა ნაციონალური მოძრაობა რამდენიმე თანაგუნდელთან ერთად დატოვა და ახალ ფრაქციას, უპარტიო დამოუკიდებელ მაჟორიტარებს, შეუერთდა. უპარტიო დამოუკიდებელი მაჟორიტარები ქართულ ოცნებასთან 2014 წლის ნოემბერში გაერთიანდნენ.

უკვე 2016 წლის საპარლამენტო არჩევნებზე ოქრიაშვილმა ქართული ოცნების სახელით იყარა კენჭი დმანისის მაჟორიტარად და გაიმარჯვა კიდეც. ის არის იმ დეპუტატთა შორის, რომლებიც კატეგორიულად ეწინააღმდეგებიან საქართველოში მაჟორიტარული სისტემის დაუყონებლივ გაუქმებას.