PSP-ს კამპანია ჩიტებს ფრენა არ ავიწყდებათ, რომელიც საქართველოს დამოუკიდებლობის დღეს მიეძღვნა, მსოფლიოს ყველაზე პრესტიჟული კრეატიული და სარეკლამო ფესტივალის — Cannes Lions International Festival of Creativity-ს ორი განსაკუთრებული ჯილდოს — Glass: The Lion for Change-ის და The Titanium Lions-ის ფინალისტებს შორის დასახელდა.

Glass და Titanium კანის ფესტივალის ყველაზე გამორჩეული ნომინაციებია, აქ ყოველწლიურად მხოლოდ ის ნამუშევრები ხვდება, რომლებიც არა მარტო შემოქმედებითი, არამედ კულტურული, საზოგადოებრივი და ინდუსტრიული გავლენითაც გამოირჩევა.

Glass: The Lion for Change აჯილდოებს ნამუშევრებს, რომლებიც ხელს უწყობს რეალურ სოციალურ ცვლილებებს და რომელთა იდეის გავლენა ისეთივე მნიშვნელოვანია, როგორც მისი კრეატიული შესრულება. The Titanium Lions კი Cannes Lions-ის უმაღლეს აღიარებებს შორისაა. აქ ხვდება ნამუშევრები, რომლებიც ცვლის ინდუსტრიის წესებს, ქმნის ახალ სტანდარტებს და განსაზღვრავს, თუ როგორი შეიძლება იყოს ბრენდის კომუნიკაციის მომავალი. The Titanium-ის შორთლისტი ყოველწლიურად მსოფლიოს ყველაზე ინოვაციურ და გავლენიან ნამუშევრებს აერთიანებს.

ჩიტებს ფრენა არ ავიწყდებათ PSP-ს საკომუნიკაციო კამპანიაა, რომელიც სააგენტო Playmakers-თან თანამშრომლობით შეიქმნა და საქართველოს ისტორიაში ერთ-ერთ ყველაზე წარმატებულ და საერთაშორისო მასშტაბით აღიარებულ კამპანიად იქცა.

Cannes Lions-ის 2026 წლის საუკეთესო ნამუშევრები, მათ შორის Glass: The Lion for Change-ისა და The Titanium Lions-ის გამარჯვებულები, 26 ივნისს, ფესტივალის დასკვნით ცერემონიაზე გამოვლინდება.