ჯაშუშობის ბრალდებით დაკავებული ჟურნალისტის, ირაკლი ჩიხლაძის შვილი, ანა ჩიხლაძე სოციალურ ქსელში განცხადებას აქვეყნებს. ის მამის დაკავებას აბსურდულს უწოდებს და საზოგადოებას მხარდაჭერისკენ მოუწოდებს.

ანა ჩიხლაძის ინფორმაციით, ჟურნალისტს 8-დან 12 წლამდე ვადით თავისუფლების აღკვეთა ემუქრება, თუმცა საქმეს ამ ეტაპზე საიდუმლოობის გრიფი ადევს.

"ჩემთვის, ჩვენი ოჯახისთვის და ყველასთვის, ვინც მამაჩემს იცნობს, ეს ამბავი აბსურდული და წარმოუდგენელია. ირაკლი არის მართლა ერთ-ერთი ყველაზე პატიოსანი და თავდადებული ჟურნალისტი... ყველაფერი ის, რასაც მამა აკეთებდა, დაკავშირებული იყო საქართველოს კეთილდღეობასთან და მშვიდობიანი მომავლის განვითარებასთან", — წერს ანა ჩიხლაძე.

მისივე განცხადებით, ბრალის წარდგენის შემდეგ ადვოკატმა აღნიშნა, რომ საქმეში არსებულ დოკუმენტებში საქართველო ნახსენებიც კი არ არის და საუბარი ჯაშუშურ საქმიანობაზე ან ქვეყნის ინტერესების წინააღმდეგ წასვლაზე ზედმეტია.

ანა ჩიხლაძე ყურადღებას ამახვილებს მამის პროფესიულ საქმიანობასა და ოჯახურ ტრაგედიაზე. მისი თქმით, 2008 წლის აგვისტოს ომში რუსების მიერ ირაკლი ჩიხლაძის ძმის, ჟურნალისტ გიგა ჩიხლაძის მკვლელობის შემდეგ, ირაკლიმ პროფესიულ გზად დიალოგი და მშვიდობისკენ სწრაფვა აირჩია. იგი მონაწილეობდა პროექტებში, რომლებიც ქართველ, აფხაზ და ოს ჟურნალისტებსა და სამოქალაქო საზოგადოების წარმომადგენლებს აერთიანებდა, მიზანი კი პროფესიულ ეთიკაზე, მედიასა და კომუნიკაციაზე მსჯელობა იყო.

"დღეს მას ბრალს სდებენ ისეთ რამეში, რაც ეწინააღმდეგება ყველაფერს, რასაც ის მთელი ცხოვრების მანძილზე ემსახურებოდა... ჩვენ პატივს ვცემთ სამართლებრივ პროცესს, მაგრამ მოვითხოვთ გამჭვირვალობას, რეალურ მტკიცებულებებსა და სამართლიან დაცვას. არავინ უნდა განადგურდეს გასაიდუმლოებული ბრალდებებით, ზეწოლით ან შეთითხნილი ნარატივით", — ნათქვამია განცხადებაში.

დაკავებულის შვილი აღნიშნავს, რომ ოჯახი რთული სამართლებრივი ბრძოლისთვის ემზადება და საზოგადოებას, კოლეგებსა და ყველას, ვისაც სამართლიანობის სჯერა, ინფორმაციის გავრცელებასა და მხარდაჭერას სთხოვს.

შეგახსენებთ, სახელმწიფო უსაფრთხოების სამსახურმა 30 მაისს, საქართველოს ინტერესების საზიანოდ ჯაშუშობისთვის, ირაკლი ჩიხლაძე და გულბაათ რცხილაძე დააკავა. მათ ბრალი 31 მაისს საქართველოს პროკურატურამ წარუდგინა.

ცნობისთვის, გულბაათ რცხილაძე ერთ-ერთია, ვისი მეთაურობითაც ცოტა ხნის წინ საქართველოში რუსოფობიის მონიტორინგის საბჭო შეიქმნა. ასევე, გულბაათ რცხილაძე სხვადასხვა დროს ჩართული იყო ისეთი წიგნებისა და დოკუმენტური ფილმების მომზადებაში, რომლებიც უკრაინაში რუსეთის ომთან დაკავშირებით კრემლის ოფიციალურ პოზიციასა და გზავნილებს ასახავდა. ამასთანავე, რეგიონებში გამართულ შეხვედრებზე ის დასავლური ინსტიტუტების მისამართით კრიტიკული და ანტიდასავლური ხასიათის განცხადებებით გამოდიოდა.

ბრალდებული ირაკლი ჩიხლაძე ადამიანის უფლებათა კავკასიური ინსტიტუტის, სამოქალაქო მოსმენების კავკასიური ცენტრის დამფუძნებელი და დირექტორია. მისი ძმა — გიგა ჩიხლაძე 2008 წლის აგვისტოს ომში მოვლენების გაშუქების დროს ჩაცხრილეს.