თურქეთმა სომხეთთან ორმხრივი ვაჭრობის შეზღუდვები მოხსნა. ინფორმაციას სომხური მედია ავრცელებს და აღნიშნავს, რომ სომხეთის საგარეო საქმეთა სამინისტრო ამ გადაწყვეტილებას მიესალმება.

"მივესალმებით თურქეთის გადაწყვეტილებას სომხეთთან ორმხრივი ვაჭრობის ბარიერების მოხსნის შესახებ, რაც სომხეთსა და თურქეთს შორის ურთიერთობების ნორმალიზების პროცესის კიდევ ერთი შედეგია", — განაცხადა სომხეთის საგარეო საქმეთა სამინისტროს პრესსპიკერმა, ანი ბადალიანმა, თურქეთის მიერ სომხეთთან ორმხრივი ვაჭრობის აკრძალვის მოხსნაზე საუბრისას.

მისივე თქმით, "ეს გადაწყვეტილება აუცილებელია ორ ქვეყანას შორის სავაჭრო და საქმიანი კავშირების გაფართოების, რეგიონში ეკონომიკური კავშირის ხელშეწყობის, მშვიდობისა და კეთილდღეობის უზრუნველყოფის თვალსაზრისით.

ხაზგასმით აღვნიშნავთ, რომ ეს მნიშვნელოვანი ნაბიჯია ორ ქვეყანას შორის სრული და ნორმალური ურთიერთობების განვითარებისკენ, რაც ლოგიკურად შეიძლება გაგრძელდეს სომხეთ-თურქეთის საზღვრის გახსნით და დიპლომატიური ურთიერთობების დამყარებით", — ნათქვამია სომხეთის საგარეო საქმეთა სამინისტროს პრესსპიკერის განცხადებაში.