ათასობით ლონდონელისთვის, რომელიც ამ ადგილს ყოველდღიურად გვერდს უვლის, სევილ როუს 3 ნომერი უბრალოდ კიდევ ერთი საცხოვრებელი სახლია. თუმცა, Beatles-ის ფანებისთვის ეს მოსალოცი ადგილია: Apple Corps-ის (ჯგუფის ხმისჩამწერი ლეიბლის) ყოფილი შტაბ-ბინა; ადგილი, სადაც ჯგუფმა ალბომი Let It Be ჩაწერა და ლოკაცია, სადაც 1969 წლის ერთ ქარიან ხუთშაბათს, "დიდებული ოთხეული" სახურავზე ავიდა და თავისი ბოლო საჯარო გამოსვლა გამართა. ეს იყო მოკლე კონცერტი, რომელიც მაშინ დასრულდა, როცა პოლიციამ აპარატურა გამორთო.

მალე საზოგადოებას საშუალება ექნება ესტუმროს იმავე სახურავს, რომელზეც პოლ მაკარტნი და ჯონ ლენონი იდგნენ: ორშაბათს Apple Corps-მა განაცხადა, რომ სევილ როუს 3 ნომერს მუზეუმად აქცევს, რომლის გახსნაც მომავალ წელს იგეგმება.

როგორც Apple Corps-ის პრესრელიზშია ნათქვამი, ობიექტი მოიცავს "შვიდ სართულს კომპანიის არქივიდან ამოღებული მასალებით, რომლებიც აქამდე არავის უნახავს". იქ ასევე განთავსდება იმ სტუდიის რეპლიკა, სადაც Beatles-მა Let It Be ჩაწერა. ფანებს ექნებათ წვდომა სახურავზეც, სადაც 1969 წლის შემდეგ, როგორც ჩანს, ბევრი არაფერი შეცვლილა.

"მოაჯირებიც კი იგივეა," — განაცხადა ტომ გრინმა, Apple Corps-ის აღმასრულებელმა დირექტორმა.

ჰოლი ტესლერმა, ლივერპულის უნივერსიტეტის ექსპერტმა Beatles-ის ტურიზმის დარგში, აღნიშნა, რომ ამ მისამართს ფანები ისედაც აწყდებიან. ეს არის ერთ-ერთი იმ ორი მთავარი ღირსშესანიშნაობიდან ლონდონში (ები-როუდის "ზებრა" გადასასვლელთან ერთად), რომელიც ჯგუფთან ასოცირდება. თუმცა, ამჟამად ფანებს მხოლოდ გარეთ დგომა და სახურავისკენ თითის გაშვერა შეუძლიათ. "შიგნით ძალიან ცოტა ადამიანია ნამყოფი. დიდი სიამოვნებით ვნახავდი იქაურობას," — დასძინა მან. ბრიტანეთში Beatles-ის სხვა მუზეუმებიც არსებობს, მათ შორის მუსიკოსების მშობლიურ ლივერპულში, თუმცა ისინი ოფიციალურად არ არის ლიცენზირებული ჯგუფის ან Apple Corps-ის მიერ.

როდესაც ჯგუფმა სახურავზე კონცერტი გამართა 1969 წლის 30 იანვარს, ლანჩის დროს (რაც ნაჩვენებია პიტერ ჯექსონის დოკუმენტურ სერიალში Get Back და მაიკლ ლინდსი-ჰოგის 1970 წლის ფილმში Let It Be), ხმაურზე მეზობელი შენობებიდან ძირითადად საქმიანი ადამიანები გამოვიდნენ საყურებლად.

"იმედია, სინჯები წარმატებით გავიარეთ," — იხუმრა მაშინ ლენონმა გამოსვლის დასრულებისას.

Beatles-ის ბოლო გამოსვლა ლონდონში, სევილ როუს 3 ნომრის სახურავზე, 1969 წელი

ფოტო: Apple Corps Ltd Images

პოლ მაკარტნიმ პრესრელიზში აღნიშნა, რომ ცოტა ხნის წინ თავადაც ესტუმრა შენობას დასათვალიერებლად. "ამ კედლებში იმდენი განსაკუთრებული მოგონებაა, სახურავზე რომ აღარაფერი ვთქვათ," — თქვა მან — "მოხარული ვარ, რომ ხალხი ამ ყველაფერს ნახავს"

მიუხედავად იმისა, რომ პრესრელიზი ხაზს უსვამს იმ კარგ დროს, რომელიც ჯგუფმა ამ შენობაში გაატარა, ბევრი ფანისთვის ეს ალბომი ასოცირდება კონფლიქტებთან, რამაც საბოლოოდ Beatles-ის დაშლა გამოიწვია. "იქნებ გაყრა ჯობდეს," — ამბობს ჯორჯ ჰარისონი პიტერ ჯექსონის ფილმის ერთ-ერთ ეპიზოდში. ტესლერის თქმით, "ეს ნამდვილად იყო პერიოდი, როცა ყველაფერი ინგრეოდა", თუმცა ამ უთანხმოებამ ფანების ინტერესი Beatles-ის ისტორიის ამ მონაკვეთის მიმართ მხოლოდ გაზარდა.

ჯგუფი ბოლო თვეებში კიდევ ერთხელ მოექცა ყურადღების ცენტრში რეჟისორ სემ მენდესის გეგმების გამო, რომელიც 2028 წლის აპრილისთვის ოთხი ფილმის გამოშვებას აპირებს ჯგუფის ისტორიაზე. ამ ფილმებში მთავარ როლებს შეასრულებენ: პოლ მესკალი (პოლ მაკარტნი), ჰარის დიკინსონი (ჯონ ლენონი), ჯოზეფ ქვინი (ჯორჯ ჰარისონი) და ბარი კიგანი (რინგო სტარი).

ასევე ნახეთ: პირველი ვიზუალები The Beatles-ის ოთხფილმიანი პროექტიდან