ოცნების სატელიტი პარტია ხალხის ძალის დეპუტატის, ვიქტორ ჯაფარიძის შვილის, გიორგი ჯაფარიძის თანამფლობელობაში არსებულმა კომპანიამ, შპს "ექსპერტ ჰაუსმა" 2018 წლიდან დღემდე, სახელმწიფო შესყიდვებით, 10 446 411 ლარი მიიღო — ინფორმაციას "საერთაშორისო გამჭირვალეობა საქართველო" ავრცელებს.

გიორგი ჯაფარიძემ დროის ამ პერიოდში 24 ტენდერში გაიმარჯვა და 8 გამარტივებული შესყიდვა გააფორმა. კომპანიამ ბოლო 990 000-ლარიანი ტენდერი აპრილს მესტიის მუნიციპალიტეტისგან მიიღო.

"შპს "ექსპერტ ჰაუსის" ძირითადი საქმიანობაა, ზედამხედველობა გაუწიოს სხვადასხვა მუნიციპალიტეტში ასევე სახელმწიფო შესყიდვებით განხორციელებულ ინფრასტრუქტურული ობიექტების სამშენებლო სამუშაოებს. სხვაგვარად რომ ვთქვათ, ქართულ ოცნებასთან დაკავშირებული რომელიმე კომპანია მოიგებს სამშენებლო ტენდერს და მის მიერ გაწეული სამუშაოს კეთილსინდისიერებას შეამოწმებს და დაუდასტურებს კონკრეტულ მუნიციპალიტეტს გიორგი ჯაფარიძის კომპანია "ექსპერტ ჰაუსი," — ვკითხულობთ ორგანიზაციის განცახდებაში.

შპს "ექსპერტ ჰაუსი" 2016 წელს რეგისტრირებული კომპანიაა, მისი მეწილეები არიან:

  • გიორგი ჯაფარიძე — 43% წილი; (წარსულში ამ წილს ვიქტორ ჯაფარიძის უფროსი ვაჟი, ოთარ ჯაფარიძე ფლობდა)
  • კახაბერ გამისონია — 32% წილი;
  • ირაკლი ქელბაქიანი — 20% წილი;
  • მურად ჯობავა — 5% წილი.

შპს "ექსპერტ ჰაუსი" მეწილეებს პოლიტიკურ შემწირველთა სიაშიც ვიპოვით — კახაბერ გამისონიამ 2014 წელს 15,000 ლარი შესწირა ქართულ ოცნებას, მურად ჯობავამ კი 2014-2017 წლებში 47,000 ლარი შესწირა ამავე პარტიას.

"ზემოაღნიშნული გარემოებები და შპს "ექსპერტ ჰაუსის" პირდაპირი კავშირები ქართულ ოცნებასთან აჩენს ეჭვებს სახელმწიფო შესყიდვებში მისი ჩართულობის კანონიერებასთან დაკავშირებით, რაც მიუკერძოებელ და ობიექტურ გამოძიებას საჭიროებს," — ვკითხულობთ ორგანიზაციის განცხადებაში.