The Legend of Aang: The Last Airbender-ის დაუგეგმავ გავრცელებასთან დაკავშირებით სინგაპურის სამართალდამცავებმა 26 წლის კაცი დააკავეს. მას ბრალად ედება მედია სერვერზე უნებართვოდ შეღწევა და ანიმაციური ფილმის უკანონოდ გავრცელება.

ეჭვმიტანილის ჩხრეკის შედეგად, სამართალდამცავებმა სხვადასხვა ელექტრონული მოწყობილობა ამოიღეს, რომელთა შემოწმების შედეგადაც აანგის ფილმის ასლი აღმოაჩინეს. გამოძიებამ დაადგინა, რომ "დაკავებულმა სერვერზე დისტანციური წვდომა მოიპოვა და ფილმი უნებართვოდ ჩამოტვირთა".

დანაშაულის დამტკიცების შემთხვევაში, ეჭვმიტანილს ემუქრება ან 7 წლამდე თავისუფლების აღკვეთა, ან — $50 000-მდე ჯარიმა, ან — ორივე ერთად.

გასულ კვირას, X-ის მომხმარებელმა სოციალურ ქსელში The Legend of Aang-ის ფრაგმენტები გამოაქვეყნა, თან ამტკიცებდა, რომ Nickelodeon-ის თანამშრომელმა ფილმი მას "შემთხვევით ელექტრონული ფოსტით გაუგზავნა". მომხმარებელი, როგორც ჩანს, Paramount-ის გადაწყვეტილებამ გააღიზიანა, რომლის მიხედვითაც ფილმი კინოთეატრების ნაცვლად პირდაპირ სტრიმინგ პლატფორმაზე უნდა განთავსებულიყო. ის კომპანიას დაემუქრა, რომ თუ აანგის ლეგენდის ტრეილერს არ გამოაქვეყნებდნენ, ფილმს სრულად ატვირთავდა სოციალურ ქსელებში.

ფოტო: TweakTown

აღნიშნულ პოსტებზე საავტორო უფლებების დარღვევის გამო შეზღუდვები დაწესდა, თუმცა ფილმი ინტერნეტში უკვე ვირუსულად იყო გავრცელებული სხვა მომხმარებლების მიერ.

The Legend of Aang: The Last Airbender-ის პრემიერა თავდაპირველად 2025 წლის 10 ოქტომბერს, კინოთეატრებში იგეგმებოდა, თუმცა მოგვიანებით თარიღმა 2026 წლის 30 იანვრისთვის გადაიწია. 2025 წლის დეკემბერში გავრცელდა ინფორმაცია, რომ პროექტი კინოეკრანებზე აღარ გამოვიდოდა. ამის ნაცვლად, ის 2026 წლის 9 ოქტომბერს Paramount+-ის სტრიმინგ სერვისზე იქნებოდა ხელმისაწვდომი.

ასევე იხილეთ: