კინო და სატელევიზიო ინდუსტრიის ერთ-ერთი უდიდესი სატკივარი ინფორმაციის გაჟონვა, ანუ დაუგეგმავად გავრცელებაა. ზოგჯერ ეს უბრალოდ სიუჟეტის დეტალების გაჟონვაა გაურკვეველი წყაროდან, სხვა დროს კი — ფილმის ან სერიალის საკვანძო სცენების გავრცელება, რაც მთელ მსოფლიოში ათასობით ფანს ასპოილერებს.

თუმცა, არსებობს ინფორმაციის დაუგეგმავად გავრცელების კიდევ ერთი, გაცილებით იშვიათი ფორმა: როდესაც მთლიანი პროექტი, მის ოფიციალურ პრემიერამდე ექვს თვეზე მეტი ხნით ადრე, დაუგეგმავად ვრცელდება. სწორედ ეს შეემთხვა ფილმს — The Legend of Aang: The Last Airbender.

დეკემბერში ცნობილი გახდა, რომ Paramount-მა უარი თქვა ფილმის კინოთეატრებში ჩვენებაზე და ამის ნაცვლად მისი Paramount+-ზე ექსკლუზიური პრემიერა არჩია.

აანგის ფილმის გამოსვლა 2026 წლის ოქტომბრისთვის იგეგმებოდა, თუმცა ეს გეგმები სრულიად აურია მთლიანი პროექტის 6 თვით ადრე, აპრილში გაჟონვამ.

ფოტო: TweakTown

იმის მიუხედავად, რომ Paramount მთელი ძალისხმევით ცდილობს ფილმის ინტერნეტიდან წაშლასა და საავტორო უფლებების დაცვას, ფაქტი ფაქტად რჩება — ფილმი უკვე ხელმისაწვდომია და ათასობით ადამიანმა (თუ მეტმა არა) ის უკვე ნახა. ბევრი ფანი მოუწოდებს Paramount-ს, რომ აღარ დააყოვნოს და ფილმი ოფიციალურად გამოუშვას, თუმცა სტუდიას ჯერჯერობით საჯარო გადაწყვეტილება არ მიუღია.

X-ის მომხმარებელი @papajoolia, რომელიც აანგის ფილმზე მუშაობდა, სოციალურ ქსელში მომხდარს რამდენიმე პოსტით გამოეხმაურა. მისი მთავარი სათქმელი ისაა, რომ ფილმის მიმართ ასეთი მოპყრობა უპატივცემულობაა:

"წლების განმავლობაში ვმუშაობდით აანგის ფილმზე იმ მოლოდინით, რომ ჩვენს დაუღალავ შრომას კინოთეატრებში ვიზეიმებდით... არა იმისთვის, რომ ახლა ვუყუროთ, როგორ უცერემონიოდ, კანფეტებივით ავრცელებენ ჩვენს კადრებს Twitter-ზე. არ მომწონს, რომ ადამიანები Paramount-ის საშინელ გადაწყვეტილებას — ფილმის კინოთეატრებიდან ამოღების შესახებ — გაჟონვის გამართლებად იყენებენ. სრულიად მესმის იმ ხალხის, ვისაც არ სურს ფულის გადახდა ან Paramount-ის მხარდაჭერა, მაგრამ ფილმის გამოსვლის შემდეგ პირატულ ვებგვერდებზე მისი ნახვა გაცილებით უკეთესი იქნებოდა, ვიდრე ეს. ეს არის წარმოუდგენელი უპატივცემულობა იმ უდიდესი შრომის მიმართ, რომელიც არტისტებმა ამ პროექტში ჩადეს".

ფოტო: NickALive!

The Legend of Aang: The Last Airbender-ის სიუჟეტის დეტალები მკაცრად იყო გასაიდუმლოებული და მათ გამჟღავნებას პირველი ტრეილერის გამოსვლამდე არავინ ელოდა. დადასტურებულია, რომ ფილმი მოგვითხრობს საკულტო სერიალის — Avatar: The Last Airbender — მთავარი გმირების შესახებ. ფილმში ისინი უკვე ზრდასრულები არიან და ცეცხლის ერთან ომის დასრულების შემდეგ მსოფლიოს აღდგენაზე ზრუნავენ.

ფოტო: Nickelodeon