თავდაცვის ყოფილი მინისტრ ჯუანშერ ბურჭულაძეს 10 წლით თავისუფლების აღკვეთა მიესაჯა.

სასამართლომ ჯუანშერ ბურჭულაძე დამნაშავედ ცნო საქართველოს სისხლის სამართლის კოდექსის 194-ე მუხლის მე-3 ნაწილის "გ" ქვეპუნქტით, 332-ე მუხლის მეორე ნაწილით. ასევე მას ჩამოერთვა ესპანეთში, მალაგას პროვინციაში, ესტეფონას მუნიციპალიტეტში მდებარე ნაკვეთი და მასზე განთავსებული სახლი, თბილისში, ნუშის ბაღების ქუჩაზე მდებარე საცხოვრებელი სახლი, ავტოსადგომი და საზაფხულო ფართი.

რას ედავებოდნენ ჯუანშერ ბურჭულაძეს?

პროკურატურის ცნობით, სასამართლოში გამოკვლეული მტკიცებულებებით დადგინდა, რომ თავდაცვის ყოფილი მინისტრის მითითებით, თავდაცვის მინისტრის იმდროინდელმა მოადგილემ გიორგი ხაინდრავამ და შესყიდვების დეპარტამენტის ყოფილმა უფროსმა ვლადიმერ ღუდუშაურმა, თავდაცვის ყოფილი მინისტრის ნათესავის ვასილ მხეიძეს დახმარებით, სამხედრო ჰოსპიტლისთვის სამედიცინო აპარატურისა და ინვენტარის შეძენის პროცესში მიზანმიმართულად შექმნეს არაკონკურენტული გარემო, რის შედეგადაც, არარეალური გარიგებების დადების გზით ხელოვნურად გაიზარდა ხელშეკრულებებით შეძენილი საქონლის ღირებულება, რითაც თავდაცვის სამინისტროს 6 985 255 ლარის ქონებრივი ზიანი მიადგა.

თავდაცვის ყოფილმა მინისტრმა განსაკუთრებით დიდი ოდენობით 7 880 786 ლარის ოდენობის უკანონო და დაუსაბუთებელი ქონების წარმოშობის დამალვის და შენიღბვის მიზნით, ასევე ქონებისთვის კანონიერი სახის მისაცემად, მეუღლესთან ერთად, ესპანეთში 544 000 ევროდ მიწის ნაკვეთი, მასზე განთავსებული სახლით შეიძინეს. აღნიშნული თანხის წარმოშობის დამალვის მიზნით კი ბრალდებულის მეუღლესა და მესამე პირს შორის დაბა წყნეთში მდებარე უძრავი ქონების ფიქტიური ნასყიდობის ხელშეკრულება გაფორმდა, ისე, რომ რეალურად ეს ქონება არ გასხვისებულა. თანხის უკანონო წარმოშობის შენიღბვის მიზნით, თავდაცვის ყოფილმა მინისტრმა თანამდებობის პირის ქონებრივი მდგომარეობის დეკლარაციაში საერთოდ არ მიუთითა ესპანეთში შეძენილი უძრავი ქონება, რითაც განსაკუთრებით დიდი ოდენობით 1 593 212 ლარის უკანონო და დაუსაბუთებელი შემოსავლის ლეგალიზაცია განახორციელა.

გიორგი ხაინდრავას და ვასილ მხეიძის განაჩენი:

თბილისის საქალაქო სასამართლომ თავდაცვის ყოფილი მინისტრი ჯუანშერ ბურჭულაძესთან ერთად, მისი ყოფილი მოადგილე, გიორგი ხაინდრავა და ბურჭულაძის ნათესავი ვასილ მხეიძეც დამნაშავედ ცნო.

გიორგი ხაინდრავა დამნაშავედ იქნა ცნობილი 182-ე მუხლის მე-2 ნაწილის "ა" და "დ" ქვეპუნქტებით, მე-3 ნაწილის "ბ" ქვეპუნქტით და 8 წლით თავისუფლების აღკვეთა განესაზღვრა.

ვასილ მხეიძე დამნაშავედ იქნა ცნობილი 25,182-ე მუხლის მე-2 ნაწილის "ა“ და "დ" ქვეპუნქტებით, მე-3 ნაწილის "ბ" ქვეპუნქტით და 339’-ე მუხლის მე-2 ნაწილით და 8 წლით თავისუფლების აღკვეთა განესაზღვრა.