ერთიან ნაციონალურ მოძრაობაში ოპოზიციის ალიანსიდან შესაძლო გამოსვლას არ გამორიცხავენ. პარტიის თავმჯდომარემ, თინა ბოკუჩავამ განმარტა, რომ ალიანსში გაწევრიანება მიხეილ სააკაშვილის ინიციატივა იყო და მიზნად საზოგადოების ჯანსაღი ნაწილის მობილიზებას ისახავდა. თუმცა, ბოლო პერიოდში განვითარებულმა მოვლენებმა და ალიანსის წევრებს შორის გაჩენილმა აზრთა სხვადასხვაობამ დღის წესრიგში ერთობლივი გადაწყვეტილების მიღების საჭიროება დააყენა.

ბოკუჩავას განცხადებით, პარტიის ამოცანა ოპოზიციური ამომრჩევლის "გალვანიზაცია" და გამარჯვების რწმენის დაბრუნებაა.

"ჩვენი ამოცანა იყო ოპოზიციურად განწყობილი ადამიანების, საზოგადოების ჯანსაღი ნაწილის კონსოლიდაცია, გალვანიზაცია; იმ ადამიანების მოტივირება, რომლებსაც შესაძლოა, ძალიანაც არ მოსწონთ ივანიშვილი, ესმით, რომ ივანიშვილის გადარჩევით თუ გადაგდებით, რეჟიმის ჩამოშორებით, არანაირი ომი არ იქნება, ქვეყანა სწორი მიმართულებით წავა. ე.წ. არჩევნებში, მაგალითად, 20%-ზე მეტის მიმხრობა ვერ მოახერხეს, მათ შორის კახა კალაძისთვის, რომელიც მათი ყველაზე პოპულარული ფიგურაა. ჩვენი ამოცანაა საზოგადოების ჯანსაღი ნაწილის მობილიზაცია, კონსოლიდაცია, ანუ შემაგრება და გაერთიანება, ასევე გალვანიზაცია, რაც ნიშნავს, რომ შეიძლება იყო გაერთიანებული, მაგრამ მოქმედებისთვის არ იყო მზად. გალვანიზაცია ნიშნავს, რომ მოქმედებაშიც მოდიხარ, მწყობრში. მოქმედებაში რომ მოხვიდე, აუცილებელია, მათ შორის, გამარჯვების რწმენა, ნდობა, რომ შეგიძლია, გამარჯვება მოიტანო. სწორედ კონსოლიდაციისთვის, გალვანიზაციისთვის და გამარჯვების რწმენისთვის შევედით ოპოზიციის ალიანსში. ჩვენ როგორც შესვლასთან დაკავშირებით მივიღეთ ერთობლივი გადაწყვეტილება, ისე გამოსვლასთან დაკავშირებით მივიღებთ ერთობლივ გადაწყვეტილებას, თუ აქამდე მივიდა საქმე", — თქვა ბოკუჩავამ ("პირველი არხი").

ბოკუჩავას თქმით, განხეთქილების მიზეზი ალიანსის მიერ მიხეილ სააკაშვილის მიმართ გამოხატული პოზიციაა.

"არ იყო და ვერც იქნებოდა. ნაციონალური მოძრაობა ვერასდროს იქნება ისეთი გაერთიანების ნაწილი, რომელიც ანტიმიშას პოზიციებს ითავსებს ან ასხივებს", — განაცხადა ბოკუჩავამ ("პირველი არხი").

შეგახსენებთ, რომ დაპირისპირების მიზეზი მესამე პრეზიდენტის კრიტიკული პოსტები გახდა. 18 აპრილს სააკაშვილმა დაწერა:

"ჩვენი გზა ვერ იქნება უნგრული და უნდა იყოს ქართული, ქართველების გზა არის რევოლუცია. ზიხართ თბილ ტელესტუდიებში და გიკვირთ, ხალხი რატომ არ მოდის რუსთაველზე".

ამ განცხადებას ალიანსში შემადგენლობაში მყოფმა პარტიებმა უპასუხეს, რომ "არცერთ პარტიას არ აქვს უფლება, თავი გამოაცხადოს საპროტესტო მოძრაობის ერთადერთ წარმომადგენლად ან ერთპარტიულ თუ ერთპიროვნულ ლიდერად".

მოგვიანებით, 21 აპრილს, მიხეილ სააკაშვილმა კოლეგებს კიდევ ერთხელ მიმართა:

"მეგობრებო, დროა, ჩემი კომპლექსისგან გათავისუფლდეთ და საქმეზე კონცენტრირდეთ რამე თუ არ გამოგდით, კი არ უნდა თქვათ, მიშა გვიშლის ხელსო, არამედ უკეთესად იმუშაოთ".