და, აი, დრო მოვიდა, ისევ დავბრუნდეთ პანემში. ამჯერად, არც მეტი, არც ნაკლები, მეორე კვარტალური ჯახისთვის.

სულ ახლახან გამოვიდა შიმშილის თამაშების ახალი ფილმის — მკის განთიადის — მორიგი ტრეილერი. სერიაში თავისი წინამორბედის (ბალადა მგალობელ ჩიტებსა და გველებზე) მსგავსად, ეს ფილმიც წინაისტორია, ე.წ. პრიკველია: მასში მოქმედება ქეთნის ევერდინის ეპოქამდე ვითარდება. მოგეხსენებათ, ქეთნისი რიგით 74-ე შიმშილის თამაშებში ასპარეზობდა, მკის განთიადში კი სიუჟეტი საიუბილეო 50-ე შიმშილის თამაშებზე, მეორე კვარტალურ ჯახის დროს ვითარდება. სწორედ ამ წელს მონაწილეობდა სასიკვდილო შეჯიბრებაში ქეთნისისა და პიტას მენტორი, ჰეიმიჩ აბერნათი.

კვარტალურ ჯახში, როგორც ალბათ იცით, კაპიტოლიუმი თამაშის წესებს ცვლის ხოლმე: ამჯერად, თორმეტ რაიონს დაევალა, ორჯერ მეტი შეწირული შეერჩიათ. ამდენად, 50-ე შიმშილის თამაშებში 24-ის ნაცვლად 48 შეწირული იბრძოლებს...

გასაკვირი არაა, რომ შიმშილის თამაშების ამ ნაწილსაც ვარსკვლავური ქასთი ჰყავს. მთავარ როლს 20 წლის ჯოზეფ ზადა ასრულებს, მაგრამ მასთან ერთად ფილმში ისეთ ლეგენდარულ მსახიობებს ვიხილავთ, როგორებიც არიან რეიფ ფაინზი (პრეზიდენტ კორიოლანუს სნოუს როლში) და გლენ ქლოუზი, რომელიც ახალ პერსონაჟს, დრუსილა სიკლს, წარმოგვიდგენს. სიკლი კაპიტოლიუმის მიერ მე-12 რაიონის შეწირულებისთვის გამოყოფილი თანმხლებია (რომლის ადგილიც მოგვიანებით ეფი თრინკეტმა დაიკავა). სხვათა შორის, ახალგაზრდა ეფის ამ ფილმშიც ვიხილავთ — პერსონაჟს, რომელიც იმ დროისთვის კაპიტოლიუმის სტილისტია, ყველასთვის საყვარელი ელ ფენინგი განასახიერებს. ვხვდებით კიდევ ერთ ნაცნობ სახეს, ტელეწამყვან სეზარ ფლიკერმანს, რომლის როლიც კირან კალკინს ერგო.

ბევრი რომ არ გავაგრძელოთ, შეგიძლია თავადვე შეავლო ყველაფერს თვალი ამ ტრეილერში...

მკის განთიადი შიმშილის თამაშების შემქმნელის, სიუზენ კოლინზის, 2025 წელს გამოქვეყნებულ ამავე სახელწოდების (Sunrise on the Reaping) ბესტსელერ რომანს ეფუძნება. წიგნმა ავტორის პირადი რეკორდი მოხსნა და გამოსვლიდან პირველივე კვირაში 1,5 მილიონზე მეტ ეგზემპლარად გაიყიდა მსოფლიოში; აქედან 1,2 მილიონი ასლი — მხოლოდ აშშ-ში, რაც ორჯერ აღემატება მისი წინამორბედის გაყიდვებს და სამჯერ — შიმშილის თამაშების ტრილოგიის დასკვნითი წიგნის, კაჭკაჭჯაფარას, იმავე მონაცემს.

შიმშილის თამაშების წიგნები, რომელთა გამოცემაც სიუზენ კოლინზმა 2008 წელს დაიწყო, მსოფლიოში ერთ-ერთ ყველაზე პოპულარულ სერიად იქცა. დისტოპიური საგა, რომელსაც ჩვენი რეალობის წინასწარმეტყველებასაც მიაწერენ, 51 ენაზეა თარგმნილი და გაყიდულია 100 მილიონზე მეტ ეგზემპლარად. ტრილოგიის მიხედვით გადაღებულმა ოთხმა ფილმმა, ჯენიფერ ლოურენსით მთავარ როლში, ჯამურად $3 მილიარდამდე გამოიმუშავა.

რაც შეეხება მკის განთიადს, ფილმი კინოეკრანებზე 20 ნოემბერს გამოვა.