"ჩვენ ვიმყოფებოდით ეუთო-ს საპარლამენტო ასამბლეის ფარგლებში, ვაკვირდებოდით არჩევნებს. არჩევნებმა საკმაოდ მშვიდ გარემოში ჩაიარა", — ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა უნგრეთში ჩატარებულ არჩევნებზე საუბრისას სამთავრობო ტელეკომპანია "იმედის ეთერში" განაცხადა. მისი თქმით, "მოსახლეობას ჰქონდა შესაძლებლობა, თავისი ნება თავისუფლად გამოეხატა".

"დასრულდა უნგრეთში საპარლამენტო არჩევნები. ჩვენ ვიმყოფებოდით ეუთო-ს საპარლამენტო ასამბლეის ფარგლებში, ვაკვირდებოდით არჩევნებს. არჩევნებმა საკმაოდ მშვიდ გარემოში ჩაიარა. მოსახლეობას ჰქონდა შესაძლებლობა, თავისი ნება თავისუფლად გამოეხატა, ზედმეტი ბარიერების, შეზღუდვების გარეშე.

იყო უპრეცედენტოდ მაღალი მონაწილეობა მოსახლეობის მხრიდან. საბოლოო ჯამში, ოპოზიციურმა ბლოკმა მიიღო გამარჯვება. ეუთო/ოდირის დასკვნები დღეს თბილისის დროით 17:00 საათზე იქნება გამოქვეყნებული, ხოლო ორი თვის თავზე საბოლოო შეფასება გაკეთდება”, — განაცხადა პარლამენტის ევროპასთან ინტეგრაციის კომიტეტის თავმჯდომარემ ლევან მახაშვილმა უნგრეთში ჩატარებულ არჩევნებზე საუბრისას. მის კომენტარს სამთავრობო ტელეკომპანია "იმედი" ავრცელებს.

ცნობისთვის, 12 აპრილს უნგრეთში გამართულ საპარლამენტო არჩევნებს ქართული ოცნების დეპუტატები: გიორგი კახიანი, დავით მათიკაშვილი, ვიქტორ სანიკიძე, ლევან მახაშვილი აკვირდებოდნენ.

უნგრეთის საპარლამენტო არჩევნებზე ხმების 98.9% უკვე დათვლილია. პეტერ მადიარის პარტიამ ხმების 53%% მოიპოვა, რაც პარლამენტში 138 მანდატის მიღებას ნიშნავს. ვიქტორ ორბანის პარტიამ კი 38% მიიღო (55 მანდატი).