29 მარტს ქუთაისში, თავისუფლების მოედნის იმერეთის ერთკვირიანი ეროვნული კამპანია სამოქალაქო ფორუმით "ახალი საზოგადოებრივი შეთანხმება საქართველოს გულისთვის ქუთაისი" დასრულდა.

ფორუმმა გააერთიანა ადგილობრივი მოქალაქეები, პროფესიონალები და საზოგადოებრივი აქტორები, რათა ერთობლივად ემსჯელათ ქვეყნის მომავალ განვითარებაზე, რეგიონების როლსა და გამოწვევებზე.

ფორუმის მთავარი მიზანი იყო რეგიონებში დაგროვებული გამოცდილების და რეალური საჭიროებების ეროვნულ დღის წესრიგში გადმოტანა. დისკუსიები შეეხო მოქალაქის ღირსების, უსაფრთხოებისა და მომავლის განვითარების საკითხებს, ასევე, მქუთაისის და იმერეთის როლს ქვეყნის დემოკრატიულ და ეკონომიკურ ცხოვრებაში.

ღონისძიების ფარგლებში სიტყვით გამოვიდნენ სხვადასხვა სფეროს წარმომადგენლები, მათ შორის „თავისუფლების მოედნის“ დამფუძნებელი ლევან ცუცქირიძე, რომელმაც განსაკუთრებული ყურადღება გაამახვილა რეგიონებში არსებულ სოციალურ რეალობასა და მოქალაქეების გაუჩინარების განცდაზე.

მისი განცხადებით: "ავტორიტარიზმმა, სიდუხჭირემ და უიმედობამ ჩვენი გენეტიკური კოდები აშალა და ადამიანი გააქრო… ამიტომ ჩემთვის ამ ფორუმის მთავარი სათქმელია, გამოჩნდით!"

ფორუმზე ხაზი გაესვა იმ გამოწვევებს, რომლებიც კამპანიის განმავლობაში სხვადასხვა მუნიციპალიტეტში გამოიკვეთა: სოფლების დაცლა, ეკონომიკური სტაგნაცია, ინფრასტრუქტურული პრობლემები და სოციალური დაუცველობა. ამავე დროს, მონაწილეებმა ისაუბრეს იმ პოტენციალზე, რომელიც რეგიონებს აქვთ განვითარებისთვის, თუ გაძლიერდება ადგილობრივი თვითმმართველობა და გაიზრდება მოქალაქეთა ჩართულობა.

ღონისძიება გაგრძელდა ორ პანელურ დისკუსიად, სადაც სპიკერებმა და აუდიტორიამ იმსჯელეს კონკრეტულ ნაბიჯებზე, რომლებიც აუცილებელია ქვეყნის დემოკრატიული და ეკონომიკური განვითარებისათვის.

"ჩემს სოფელში, ფულარიანების უბანში სულ 24 ოჯახია, აქედან 18-ს ემიგრანტი არჩენს… მოსახლეობას აღარ აქვს იმის განცდა, რომ საკუთარი სოფელი თუ ქალაქი მათ ეკუთვნით. სინამდვილეში, სწორედ მათი ჩართულობით უნდა ვითარდებოდეს რეგიონი, ამ ხალხის გადასაწყვეტია რა არის მათთვის პრიორიტეტი და როგორ უნდა მოხდეს მნიშვნელოვანი საკითხების გადაწყვეტა. დროა, ხალხმა დაიბრუნოს საკუთარი უფლებები", — განაცხადა ფორუმის ერთ-ერთმა სპიკერმა, "დიმელი ქალების" დამფუძნებელმა ლილი ფულარიანმა.

ფორუმი წარმოადგენდა იმ ფართო სამოქალაქო პროცესის ნაწილს, რომელიც მიზნად ისახავს საზოგადოების სხვადასხვა ჯგუფის გაერთიანებას საერთო ხედვის ირგვლივ საქართველოს უკეთესი მომავლისთვის.