"არც ლელოს წევრი ვყოფილვარ ოდესმე და მითუმეტეს არც ALDE-სი, საიდან უნდა გამრიცხონ?", — ამის შესახებ კოალიცია ლელო — ძლიერი საქართველოს ერთ-ერთი ლიდერი, ალეკო ელისაშვილი ციხიდან წერს.

ის ოცნებას მოუწოდებს, "გაემიჯნოს პარლამენტის უვიც, უცოდინარ და ადამიანის უფლებების დამრღვევ თავმჯდომარეს".

"პაპუაშვილს სასამართლოზე ადრე უმსჯელია და გამოუტანია ჩემთვის უკვე განაჩენი. ასეთ განცხადებებს რომ ავრცელებ ადამიანი ან უვიცი ხარ, ან მავნებელი.

ამხელა საკანონმდებლო ორგანოს თავმჯდომარე ვარო რომ იძახი, ადამიანის უფლებებს რომ არ აღიარებ გასაგებია, მაგრამ არც კანონს იცავ, არც უდანაშაულობის პრეზუმფციას.

როგორც ჩანს ძალზედ შეშინებულია და ბოლო დროს მხოლოდ ჩემზე ფიქრობს. არ იდარდოს, საქართველოში ყველაზე მკაცრ ციხეში ვარ გამოკეტილი, ვერაფერს დავუშავებ. შეუძლია თავად მოვიდეს, ნახოს. აქაურობასაც შეძლებისდაგვარად დავათვალიერებინებ და იქნებ ადამიანის უფლებებიც უკეთ განვუმარტო.

ძალიან მკაფიოდ მინდა ხაზი გავუსვა, რომ პროტესტის ფორმის გამოსახატად და ასარჩევად არც არასდროს არავის დავალებები მიმიღია და შემისრულებია და არც მომავალში ვაპირებ. ასე მიცხოვრია მთელი ცხოვრების მანძილზე და ასეც გავაგრძელებ. თავიანთ თავებში ვეშლები.

ეს ყველაფერი ძალიან კარგად იციან ოცნებაშიც, ამაზე არიან გამწარებულები, აიჩხლართნენ, ხან რომელი ერთობიდან ითხოვენ ჩემს გარიცხვას და ხან რომლიდან. არც ლელო" წევრი ვყოფილვარ ოდესმე და მითუმეტეს არც ALDE-სი, საიდან უნდა გამრიცხონ? თავად ოცნებას კი მოვუწოდებ გაემიჯნოს პარლამენტის უვიც, უცოდინარ და ადამიანის უფლებების დამრღვევ თავმჯდომარეს," — წერს ალეკო ელისაშვილი ციხიდან.

შეგახსენებთ, რომ ოცნების პარლამენტის თავმჯდომარემ, შალვა პაპუაშვილმა რამდენჯერმე მოუწოდა კოალიცია ძლიერ საქართველო — ლელოს და და ALDE-ს, გაემიჯნონ და გარიცხონ პარტიიდან ალეკო ელისაშვილი.

ალეკო ელისაშვილია 29 ნოემბერს თბილისის საქალაქო სასამართლოს კანცელარიის შენობის დაწვის მცდელობისთვის დააკავეს. პროკურატურამ მას ბრალი ტერორისტული აქტის ჩადენის მცდელობის ფაქტზე" წარუდგინა. 1-ელ დეკემბერს ელისაშვილს წინასწარი პატიმრობა შეეფარდა.

მეტი ალეკო ელისაშვილის საქმეზე: