სულხან-საბა ორბელიანის უნივერსიტეტის ბიზნესისა და ტექნოლოგიების ფაკულტეტი უკვე მეექვსე წელია წარმატებით ახორციელებს მასშტაბურ პროექტს — სამეწარმეო იდეების კონკურსს, რომელიც წლების განმავლობაში იქცა პლატფორმად, სადაც ასობით ახალგაზრდამ საკუთარი იდეა რეალურ ბიზნესად აქცია.

პროექტის მიზანია არა მხოლოდ ნიჭიერი და ინოვაციური ახალგაზრდების აღმოჩენა, არამედ მათთვის იმ პრაქტიკული ცოდნისა და უნარების გადაცემა, რომლებიც თანამედროვე ბიზნეს გარემოში გადამწყვეტ როლს ასრულებს.

ბიზნეს მარათონი ყოველწლიურად აერთიანებს სკოლებისა და უნივერსიტეტის მოტივირებულ ახალგაზრდებს, რომლებსაც სურთ თავიანთი იდეებითა და შემოქმედებითი ხედვით შეცვალონ მომავალი. მონაწილეებს შესაძლებლობა აქვთ იმუშაონ გამოცდილი მენტორების მხარდაჭერით და მიიღონ რეალურ ბაზარზე ორიენტირებული ცოდნა, რაც იდეის განვითარებასა და მის ბიზნესად გარდაქმნას უწყობს ხელს.

2026 წლის მარათონის ფარგლებში, უნივერსიტეტი იწვევს მე-10, მე-11 და მე-12 კლასის მოსწავლეებს მთელი საქართველოს მასშტაბით, რათა გამოსცადონ საკუთარი ძალები ბიზნესის დაგეგმვასა და იდეის განვითარებაში.

ღონისძიების თარიღი: 30 აპრილი

გამარჯვებულები დაჯილდოვდებიან ფულადი პრიზებითა და სპეციალური სამოტივაციო საჩუქრებით.

ჟიური ბიზნეს იდეებს შემდეგი კრიტერიუმებით შეაფასებს:

• ინოვაციურობა და მდგრადობა — რამდენად ახალი, განსხვავებული და გრძელვადიან პერსპექტივაში სიცოცხლისუნარიანია იდეა;
• ბაზრის შესაბამისობა — რამდენად პასუხობს პროექტი რეალურ სიტუაციასა და მომხმარებელთა საჭიროებებს;
• განხორციელებადობა — რამდენად რეალისტურია იდეის პრაქტიკაში განხორციელება და ბიზნესად ქცევა;
• ბიზნესმოდელი — რამდენად ლოგიკურად არის ჩამოყალიბებული შემოსავლის წყაროები, სტრატეგია და ბიზნესის ფუნქციონირების მექანიზმი.

“ჩვენი მიზანია შევქმნათ გარემო, სადაც ახალგაზრდებს შეეძლებათ გამოავლინონ და განავითარონ საკუთარი ინოვაციური პოტენციალი. აღნიშნული პროექტი მნიშვნელოვანი პლატფორმაა, რომელიც ხელს უწყობს მათ ჩამოყალიბებას, მომავალ ინოვატორებად და მეწარმეებად. გვჯერა, რომ მსგავსი ინიციატივები ქმნის იმ თაობას, რომელიც მნიშვნელოვან წვლილს შეიტანს ქვეყნის ეკონომიკურ განვითარებასა და კონკურენტუნარიანობის ზრდაში.“ — აღნიშნავს პროფესორი თამთა მიქაბერიძე, ბიზნესისა და ტექნოლოგიების ფაკულტეტის დეკანი.

ექვსწლიანი გამოცდილება აჩვენებს, რომ ბიზნეს მარათონი მხოლოდ ერთჯერადი აქტივობა არ არის, ის გრძელვადიანი ინვესტიციაა მომავალ თაობის ფორმირებაში. პროექტის ფარგლებში უნივერსიტეტი აქტიურად უწყობს ხელს მეწარმეობის კულტურის განვითარებას როგორც საუნივერსიტეტო, ისე სასკოლო დონეზე და ქმნის სივრცეს, რომლის ფარგლებშიც ახალგაზრდებს შეუძლიათ საკუთარი იდეების რეალიზება.

მომავალი თაობის მეწარმეების აღმოჩენა სულხან-საბა ორბელიანის უნივერსიტეტის ბიზნესისა და ტექნოლოგიების ფაკულტეტის ერთ-ერთი მთავარი პრიორიტეტია. სწორედ ამიტომ, ბიზნეს მარათონი გააგრძელებს ახალგაზრდების მოტივაციასა და მათთვის ახალი შესაძლებლობების შექმნას.

რეგისტრაციის ბოლო ვადა: 20 აპრილი