მსოფლიოში ერთ-ერთ უდიდეს ქრისტიანულ კონფესიას თავისი არსებობის ისტორიაში პირველად ეყოლება ქალი წინამძღოლი. ანგლიკანური ეკლესიის მეთაური მთავარეპისკოპოსი სარა მალალი გახდა. 63 წლის მალალი ასევე არის პირველი ქალი მთავარეპისკოპოსი კენტერბერის კათედრალისა, რომლის ისტორიაც 597 წელს, წმინდა ავგუსტინეს არქიეპისკოპოსობით იწყება. აქამდე ამ საყდრის პირველი 105 წინამძღოლი კაცი სასულიერო პირი იყო.

მართალია, მთავარეპისკოპოსი მალალი მოვალეობის შესრულებას იანვრიდან შეუდგა, მაგრამ ოფიციალურად 25 მარტს ეკურთხა ინგლისის ეკლესიის მეთაურად და 85 მილიონამდე ანგლიკანი მორწმუნის სულიერ ლიდერად. ამ ტრადიციებით მდიდარ ცერემონიას, რომლითაც სიმბოლურად აღინიშნება მთავარეპისკოპოსობის დაწყება, კენტერბერიში ბრიტანეთის პრემიერმინისტრი, სამეფო ტახტის მემკვიდრე პრინცი უილიამი და პრინცესა ქეთრინიც ესწრებოდნენ.

ფოტო: PA Media

"ჩვენს მთავარეპისკოპოსად ქალის კურთხევა 50 წლის წინაც კი წარმოუდგენელი იქნებოდა", — აღნიშნავს კენტერბერის კათედრალის დეკანოზი.

ინგლისის ეკლესიამ ქალების მღვდლად კურთხევის უფლება 1994 წელს გასცა, 2015 წელს კი ქალი პირველად ეკურთხა ეპისკოპოსად. ანგლიკან მორწმუნეებში ამ საკითხზე აზრი ორადაა გაყოფილი. მეტიც, თავად მალალის მთავარეპისკოპოსობასაც კონსერვატორულად განწყობილი ანგლიკანური ჯგუფები უარყოფითად შეხვდნენ და განაცხადეს, რომ "ბიბლია მხოლოდ კაცების ეპისკოპოსობას ცნობს". ანგლიკანურ ეკლესიაში აზრთა სხვადასხვაობაა ასევე ისეთ საკითხებზეც, როგორიცაა ლგბტქ წყვილების ქორწინების კურთხევა.

ფოტო: Gareth Fuller / POOL / AFP

სანამ მღვდელი გახდებოდა, მთავარეპისკოპოსი მალალი წლების განმავლობაში მედდად მუშაობდა. თავის ამ საერო წარსულზე ხაზგასასმელად, კურთხევის ცერემონიაზე მისი შესამოსელი ქამრის ბალთით იყო გაფორმებული. პირველ ანგლიკან არქიეპისკოპოს ქალს ქმარი და ორი შვილი ჰყავს. წინათ მან ასევე აღნიშნა, რომ დისლექსია აქვს და ამის გამო ბიბლიური გენეალოგიების წაკითხვა უჭირს.

ცერემონიის დასასრულს, მალალის წმინდა ავგუსტინის საეპისკოპოსო ტახტი ებოძა, რომელიც მარმარილოსგანაა დამზადებული და მე-13 საუკუნის დასაწყისით თარიღდება.

აღსანიშნავია, რომ მთავარეპისკოპოსმა მალალიმ საქართველოს მართლმადიდებელ მრევლს რამდენიმე დღის წინ სამძიმრის წერილიც გამოუგზავნა პატრიარქ ილია II-ის გარდაცვალებასთან დაკავშირებით.